ខណៈដែលទីក្រុងប៉េកាំងបានគម្រាមសហរដ្ឋអាមេរិកជាមួយការហាមប្រាមការនាំចេញធាតុកម្រខណៈដែលភាពតានតឹងបានកើនឡើង ប្រព័ន្ធផ្សព្វផ្សាយចិនបានគម្រាមសហរដ្ឋអាមេរិកថា «កុំនិយាយថា យើងមិនបានព្រមានអ្នក»។
សារព័ត៌មាន People's Daily ដែលជាកាសែតរបស់គណបក្សកុម្មុយនីស្តកំពុងកាន់អំណាចបានប្រើប្រាស់ឃ្លាមួយកាលពីថ្ងៃពុធ ដែលក្នុងនោះចិនបាននិយាយថា ប្រទេសចិននឹងមិនទទួលយកការគាបសង្កត់របស់សហរដ្ឋអាមេរិកចំពោះការអភិវឌ្ឍរបស់ចិនទេ។
នៅថ្ងៃទី ១៥ ខែឧសភា រដ្ឋបាលលោកត្រាំបានចុះហត្ថលេខាលើបទបញ្ជា ដែលអាចហាមឃាត់ក្រុមហ៊ុនចិនធំ ៗ ដូចជាក្រុមហ៊ុនបច្ចេកវិទ្យា Huawei ពីការទិញគ្រឿងសំខាន់ៗមួយចំនួនដូចជាបន្ទះកុំព្យូទ័រសហរដ្ឋអាមេរិក។ បន្ទះទាំងទាំងនោះត្រូវបានផលិតឡើងដោយធាតុកម្រ ដែលចិនជាអ្នកនាំចេញដ៏ធំ។
សេចក្តីអត្ថាធិប្បាយដែលបានចុះផ្សាយនៅក្រោមឈ្មោះក្លែងក្លាយ Wuyuehe បាននិយាយថា «បច្ចុប្បន្នសហរដ្ឋអាមេរិកពិតជាវាយតម្លៃខ្ពស់លើលទ្ធភាពរបស់ខ្លួនក្នុងការគ្រប់គ្រងខ្សែសង្វាក់ផ្គត់ផ្គង់សកល ហើយវានឹងជាការទះកំភ្លៀងខ្លួនឯងបន្ទាប់ពីការសប្បាយរីករាយ ការក្រអឺតក្រទម និងការមានមោទនភាពលើខ្លួនឯង។ កុំនិយាយឲ្យសោះថា យើងមិនបានព្រមានអ្នក»។
សារព័ត៌មាន People's Daily បានប្រើពាក្យសម្តីបែបនេះនៅឆ្នាំ ១៩៦២ មុននឹងផ្ទុះសង្គ្រាមជាមួយឥណ្ឌា និងសង្គ្រាមជាថ្មីនៅឆ្នាំ ១៩៧៨ មុនការចូលឈ្លានពានវៀតណាម។ កាសែតនោះក៏បានប្រើប្រាស់ភាសានេះទៅលើតៃវ៉ាន់ផងដែរ។
មកទល់ពេលប្ចុប្បន្ននេះ ចិនកំពុងដងចង្កាមាន់ ខណៈដែលសហរដ្ឋអាមេរិកបង្កើនការទះកំភ្លៀងកាន់តែខ្លាំងទៅលើចិន ដែលធ្វើឲ្យចិនកាន់តែគ្មានសង្ឃឹមថានឹងងើបរួច។ នៅថ្ងៃទី១០ ឧសភា អាមេរិកបានបង្កើនការយកពន្ធលើការនាំចេញរបស់ចិន ១០ ទៅ ២៥ភាគរយលើពន្ធ ២០០ពាន់លានដុល្លារ។
កិច្ចចរចាពាណិជ្ជកម្មរវាងអាមេរិក និងចិនបានជាប់គាំង។ លោកត្រាំបាននិយាយកាលពីថ្ងៃចន្ទនៅជប៉ុនថា លោកមិនបានត្រៀមខ្លួនសម្រាប់កិច្ចព្រមព្រៀងនោះទេ។
សហរដ្ឋអាមេរិកបានយកពន្ធលើទំនិញរបស់ចិនច្រើនជាងចិនធ្វើមកលើសហរដ្ឋអាមេរិកឆ្ងាយណាស់។ យ៉ាណាមិញ ខណៈដែលសហរដ្ឋអាមេរិកកាន់តែគាប ក ចិនលើការយកពន្ធ ចិនក៏បានយកធាតុកម្រមកដាក់នៅមុខ ដើម្បីទប់ទល់ជាមួយអាមេរិក។
សារធាតុកម្រមានដូចជាលោហ រ៉ែដែកជាដើមត្រូវបានផលិតដោយចិន ៨០ភាគរយនាំចេញដោយសហរដ្ឋអាមេរិកនៅឆ្នាំ ២០១៤ និងឆ្នាំ ២០១៧។ នេះបើយោងតាមការស្ទង់មតិភូគព្ភសាស្ត្ររបស់សហរដ្ឋអាមេរិក។
ក្នុងសេចក្តីថ្លែងការណ៍ដែលបានបង្ហោះនៅលើគេហទំព័ររបស់ខ្លួននៅថ្ងៃពុធ អ្នកតំណាងគណៈកម្មាធិការកំណែទម្រង់ និងការអភិវឌ្ឍជាតិដ៏មានឥទ្ធិពលរបស់ប្រទេសចិនបានព្រមានម្តទៀតថាលទ្ធភាពនៃការចាត់វិធានការលើសារធាតុកម្រ។
កាលពីថ្ងៃទី២០ ខែឧសភា លោកស៊ីជីនពីង (Xi Jinping) ប្រធានាធិបតីចិនបានធ្វើដំណើរទស្សនកិច្ចទៅកាន់រោងចក្រផលិតសារធាតុកម្រនៅក្នុងខេត្តស៊ីងជាំង ដែលអ្នកវិភាគមើលឃើញថា ជាការបញ្ជូនសារទៅកាន់សហរដ្ឋអាមេរិក។
ដំណើរទស្សនកិច្ចនេះ ធ្វើឡើងខណៈដែលក្រុមហ៊ុនហួវ៉េចិនកំពុងស្ថិតលើផ្លូវមរណៈ ខណៈដែលអាមេរិកចាត់វិធានការគ្រប់យ៉ាងលើក្រុមហ៊ុនមួយនេះ ដែលល្មើសទណ្ឌកម្មរបស់សហរដ្ឋអាមេរិក៕