ក្រុមអ្នកវិទ្យាសាស្ត្រ បានរកឃើញដើមឈើមួយប្រភេទស្ថិតនៅក្នុងចំណោមដើមឈើអាយុកាលវ័យចំណាស់ជាងគេបំផុតនៅលើពិភពលោក នៅឯតំបន់ព្រៃលិចទឹកតាមដងទន្លេខ្មៅ ស្ថិតក្នុងរដ្ឋ North Carolina សហរដ្ឋអាមេរិក។
ដើមឈើប្រភេទស្រល់ទំពែកបុរាណមួយនេះ ត្រូវបានរកឃើញដោយក្រុមអ្នកស្រាវជ្រាវ ដែលបានសិក្សារង្វង់ដើមឈើនៅក្នុងតំបន់នោះ ជាផ្នែកមួយនៃកិច្ចខិតខំប្រឹងប្រែង ដើម្បីដឹងកាន់តែច្រើនពីប្រវត្តិសាស្ត្របរិកាសនៅតំបន់ភាគខាងកើតសហរដ្ឋអាមេរិក។
ដើមឈើមួយនេះ ត្រូវបានគេចាត់ទុកថាស្ថិតនៅក្នុងចំណោមដើមឈើមានអាយុកាលវ័យចំណាស់ជាងគេបំផុតនៅលើពិភពលោក ហើយវាគឺជាដើមឈើតែមួយគត់ ដែលគេអាចកំណត់អត្តសញ្ញាណបាន។
ដើមស្រល់ទំពែកបុរាណទី២ដែលមានអាយុកាលប្រហែល២០៨៨ឆ្នាំ ត្រូវបានគេរកឃើញផងដែរនៅតំបន់ព្រៃលិចទឹកតែមួយ ជាហេតុនាំឲ្យមានការលើកឡើងថា វាអាចនឹងមានសំណាកចាស់ៗអាយុកាលជាង២ពាន់ឆ្នាំជាច្រើនទៀត នៅក្នុងតំបន់នោះ។
ក្រុមអ្នកស្រាវជ្រាវ បានសរសេរថា ដោយសារតែយើងធ្លាប់តែរកឃើញដើមស្រល់បុរាណអាយុកាលត្រឹម១១០ឆ្នាំនៅទីនោះ ការរកឃើញដើមស្រល់ទំពែកបុរាណអាយុកាលជាង២ពាន់ឆ្នាំនៅតំបន់លិចទឹកនេះ ច្បាស់ណាស់ថា នឹងមានដើមស្រល់ទំពែកបុរាណជាច្រើនទៀត មានដុះនៅតាមបណ្តោយតំបន់លិចទឹកលាតសន្ធឹងចម្ងាយ១០០គ.មតាមដងទន្លេខ្មៅនេះ។
សូមបញ្ជាក់ថា ការរកឃើញនេះដែរ បានធ្វើឲ្យដើមស្រល់បុរាណមួយនេះ ក្លាយជាដើមឈើដុះក្នុងតំបន់លិចទឹកមានអាយុកាលចាស់ជាងគេបំផុត ហើយនិងជាដើមឈើចាស់ជាងគេលំដាប់ថ្នាក់ទី៥ នៅលើផែនដី ក្នុងនោះដើមឈើដែលចាស់ជាងគេបំផុត គឺជាដើមស្រល់ប្រ៊ីស្តលខុន ដែលត្រូវបានរកឃើញនៅអាំងទឹក Great Basin នៅអាមេរិកខាងជើង ហើយវាមានអាយុកាលប្រហែល៥ពាន់ឆ្នាំ៕