…បុរសម្នាក់នេះក្រោយពីដើរទាត់ខ្យល់ អត់ការងារធ្វើហើយលុយកាក់ក៏គ្មានសល់មួយសេនក្នុងហោប៉ាវព្រោះតែញៀនខ្លាំងពេកទៅលើល្បែងអនឡាញ។ នៅថ្ងៃមួយក្រោយពីចាញ់ល្បែងបោសគូទខោ ហើយក្រពៈកូរគ្រូកៗផងទៀតនោះ បុរសរូបនេះបានដើរចូលទៅក្នុងហាងហើយធ្វើសកម្មភាពដែលអ្នកផងទាំងឡាយចាត់ទុកដូចជាមនុស្សសរសៃប្រសាទយ៉ាងអញ្ចឹង!។បុរសឈ្មោះ Mengmou អាយុ២៤ឆ្នាំម្នាក់នេះ បានចូលទៅប្លន់ចំណីពីហាងទំនិញមួយកន្លែងក្នុងទីក្រុង Taiyuan។
យោងតាមវីដេអូបានបង្ហាញឲ្យឃើញថា Mengmou បានដើរចូលទៅក្នុងហាងទំនិញដោយដៃមានកាន់កាំបិតរួចបញ្ជាឲ្យបុគ្គលិកម្នាក់ទៅប្ដឹងប៉ូលិស។ បន្ទាប់មកទៀត គាត់បានយកតែទឹកដោះគោផឹក ហូបនំប៉ាវ និងយកបារីជក់។ មិនយូរប៉ុន្មាន ក្រុមប៉ូលិសក៏បានមកដល់ ហើយចាប់ខ្លួនគាត់បញ្ជូនទៅកាន់ប៉ុស្ដិ៍ប៉ូលិស។ ប៉ូលិសបានឲ្យដឹងដែរថា Mengmou ផ្លាស់មករស់នៅក្នុងទីក្រុង Taiyuan តាំងពីខែមីនាមកម្ល៉េះ និងធ្វើការជាសន្ដិសុខ តែលុះមកដល់ខែកក្កដា គាត់ក៏ត្រូវបានបាត់បង់ការងារ។ Mengmou គឺជាមនុស្សញៀននឹងហ្គេម បានលក់ទូរស័ព្ទរបស់ខ្លួនដើម្បីយកប្រាក់ចំណាយទៅលើហ្គេមអនឡាញ។ ក្រោយពីគ្មានសល់ប្រាក់ជាប់ខ្លួន ទើបមានគំនិតធ្វើសកម្មភាពប្លន់ឲ្យប៉ូលិសចាប់ ដើម្បីបានទៅរស់នៅក្នុងពន្ធនាគារ។
ជុំវិញករណីខាងលើនេះ Mengmou ត្រូវបានប៉ូលិសចាប់ឃុំឃាំង ចំណែកអីវ៉ាន់ក្នុងហាងត្រូវខាតបង់សរុបជាទឹកប្រាក់អស់ចំនួន២៥យ័ន គឺប្រមាណជាជិត៤ដុល្លារ៕