ប្រព័ន្ធផ្សព្វផ្សាយជាច្រើនបានរាយការណ៍នៅថ្ងៃទី៦ មិថុនានេះថា ទីក្រុងប៉េកាំងកំពុងស្ថិតក្នុងភាពភ័យស្លន់ស្លោ និងកំពុងក្តៅក្រហាយយ៉ាងអន្ទះសារចំពោះទង្វើរបស់សហរដ្ឋអាមេរិកប្រឆាំងមកលើខ្លួន ក្នុងសំណុំរឿងសង្គ្រាម និងរឿងដ៏រសើបមួយទៀត គឺកោះតៃវ៉ាន់។ សង្គ្រាមពាណិជ្ជកម្មសហរដ្ឋអាមេរិកកំពុងគ្របដណ្តប់ និងកំពុងមានប្រៀបលើចិនដីគោក ដែលធ្វើឲ្យចិនទទួលរងគ្រោះយ៉ាងធ្ងន់ធ្ងរបីដូចជាភ្នំបាក់សង្កត់មកលើខ្លួន។ ចំណែកសំណុំរឿងតៃវ៉ាន់វិញ ចិនហាក់បីដូចជាកំពុងឃ្លាតកាន់តែឆ្ងាយពីការក្រសោបយកកោះតៃវ៉ាន់។ ក្តីស្រមៃឬសុបិន្តអាក្រក់ក្នុងការយកកោះតៃវ៉ាន់មកគ្រប់គ្រងវិញពីសំណាក់ចិនដីគោកហាក់បីដូចជាឆ្ងាយនៅជើងមេឃ។
ប្រព័ន្ធផ្សព្វផ្សាយ Bloomberg បានរាយការណ៍ថា សហរដ្ឋអាមេរិកកំពុងបន្តលក់អាវុធទៅឲ្យកោះតៃវ៉ាន់ក្នុងទំហំទឹកប្រាក់ ២ពាន់លានដុល្លារ។ ប្រភពអានាមិកចំនួន ៤បាននិយាយថា ការលក់គ្រឿងសព្វាវុធាដ៏ធំធេងនេះរួមបញ្ចូលនូវអង្គភាពយោធាទូទៅចំនួន ១០៨មុខ ដោយមានទាំងរថក្រោះអាប្រាហាម M-1A2 ដែលមានតម្លៃប្រហែល ២ពាន់លានដុល្លារ ក៏ដូចជា អាវុធប្រឆាំងយន្តហោះ និងប្រឆាំងរថក្រោះ។
ជាមួយគ្នានេះដែរ តៃវ៉ាន់ក៏ចង់ធ្វើទំនើបកម្មលើរថក្រោះផលិតឡើងដោយសហរដ្ឋអាមេរិក ដែលប្រទេសនេះមានស្រាប់ផងដែឬ ដូចជារថក្រោះ M60 Patton។
លោកស្រី Tsai Ing-wen ប្រធានាធិបតីតៃវ៉ាន់បាននិយាយកាលពីខែមីនាថា សហរដ្ឋអាមេរិកបានឆ្លើយតបជាវិជ្ជមានចំពោះសំណើរបស់ទីក្រុងតៃប៉ិសម្រាប់ការលក់អាវុធថ្មី ដើម្បីបង្កើនសមត្ថភាពការពាររបស់ជាតិ ដើម្បីប្រឈមនឹងសម្ពាធពីប្រទេសចិន។ សហរដ្ឋអាមេរិកមិនមានចំណងផ្លូវការជាមួយកោះតៃវ៉ាន់នោះទេ ប៉ុន្តែត្រូវបានភ្ជាប់ទំនាក់ទំនងដោយច្បាប់ ដើម្បីផ្តល់មធ្យោបាយក្នុងការការពារកោះនោះ។
កាលពីប៉ុន្មានសប្តាហ៍មុន សភាជាន់ទាបសហរដ្ឋអាមេរិកបានអនុម័តច្បាប់គាំទ្រដល់កោះតៃវ៉ាន់ពេញទំហឹងក្នុងការការពារកោះមួយនេះ។
ការកំណត់ចំណាំរបស់សភាពរួមបញ្ចូននូវគ្រឿងសព្វាវុធប្រឆាំងរថក្រោះ ដោយមានប្រភេទមីស៊ីលចាវលីនរបស់ក្រុមហ៊ុនឡក់ឃីតម៉ាធីន និងក្រុមហ៊ុនរេឌិអន (Raytheon Co) មានតម្លៃ ១២៩លានដុល្លារ។ នេះបើតាមប្រភពចំនួន ២។
បន្ថែមលើសនេះ កំណត់សម្គាល់ពីសភាក៏បញ្ជូលទាំងមីស៊ីលប្រឆាំងរថក្រោះចំនួន ១ ២៤០គ្រាប់មានតម្លៃ ២៩៩លានដុល្លារ និងមីស៊ីលស្ពាយលើស្មាបាញ់យន្តហោះចំនួន ២៥០គ្រាប់តម្លៃ ២២៣លាន។
កាលពីសប្តាហ៍មុន មន្ទីរប៉ង់តាហ្គោនបានប្រកាសថា ខ្លួននឹងលក់យន្តហោះគ្មានមនុស្សបើក ScanEagle ចំនួន ៣៤គ្រឿងដែលផលិតដោយក្រុមហ៊ុន Boeing ទៅឲ្យរដ្ឋាភិបាលម៉ាឡេស៊ី ឥណ្ឌូនេស៊ីហ្វីលីពីន និងវៀតណាមក្នុងតម្លៃ ៤៧លានដុល្លារ។
កាលពីខែមុន មានសេចក្តីរាយការណ៍ថា លោកត្រាំបានឯកភាពលើសំណើទិញយន្តហោះចម្បាំង F-16 ប្រមាណជាង ១០០គ្រឿង។
កាលពីសប្តាហ៍មុន រដ្ឋមន្ត្រីការបរទេសចិន លោក វ៉ាង យីបានព្រេមានកុំឲ្យសហរដ្ឋអាមេរិកលូកដៃជ្រៀតជ្រែករឿងកិច្ចការតៃវ៉ាន់ យ៉ាងណាមិញ ជារឿយៗ អាមេរិកតែងខោកក្បាលចិន ជុំវិញការបញ្ជូននាវាចម្បាំងធ្វើនាវាចរដោយសេរីនៅក្នុងសមុទ្រចិនខាងត្បូង និងច្រកសមុទ្រតៃវ៉ាន់ ដើម្បីបញ្ជាក់ពីដែនទឹកអន្តរជាតិ ខណៈដែលចិនកំពុងតែវ៉ាងទីកាន់តែខ្លាំង។
វត្តមានមីស៊ីល រថក្រោះ យន្តហោះចម្បាំង និងគ្រឿងសព្វាវុធសហរដ្ឋអាមេរិកនៅលើទឹកដីតៃវ៉ាន់ ធ្វើឲ្តចិនដេកមិនលក់បក់មិនល្ហើយ។ ស្ថានភាពនេះគេមើលឃើញថា ការប្តេជ្ញាយកកោះតៃវ៉ាន់មកគ្រប់គ្រងវិញរបស់លោកស៊ី ជិនពីង គឺគ្រាន់តែជាសុបិន្តអាក្រក់របស់ចិនតែប៉ុណ្ណោះ។ អ្នកវិភាគធ្លាប់ប្រាប់សារព័ត៌មាន The National Interest ថា សមត្ថភាពចិននៅស្ទើរណាស់ គ្មានវាសនាអាចចូលឈ្លានពានកោះតៃវ៉ាន់បានជាដាច់ខាត៕
Home ព្រឹត្តិការណ៍ថ្មីៗ ចិនកំពុងចាញ់ច្រាបតៃវ៉ាន់ ខណៈដែលអាមេរិកត្រៀមលក់អាវុធទៅឲ្យកោះនេះក្នុងទំហំទឹកប្រាក់ ២ពាន់លានដុល្លារ