កាលពីថ្ងៃពុធសភាថៃបានបោះឆ្នោតជ្រើសរើសលោកប្រាយុទ្ធ ចាន់អូចាជានាយករដ្ឋមន្ត្រីសម្រាប់អណត្តិបន្ទាប់។
លោកប្រាយុទ្ធបានទទួល ៣៧៥សម្លេង ខណៈដែលសម្លេងត្រូវឈ្នះជានាយករដ្ឋមន្ត្រីតម្រូវឲ្យមានច្រើនជាងពាក់កណ្តាលនៃសមាជិកសភា ៧៥០នាក់។ នាយករដ្ឋមន្ត្រីថៃត្រូវបានជ្រើសរើសនៅក្នុងសម្លេងរួមនៃសភាដែលមានចំនួន ៥០០អាសន្នៈ និងព្រឹទ្ធសភា ២៥០អាសន្នៈ ដែលសមាជិកត្រូវបានតែងតាំងដោយយោធា។
ការបោះឆ្នោតនេះបានផ្ទេរអំណាចកាន់កាប់ដោយស៊ីវិលជាផ្លូវការ បន្ទាប់ពីការគ្រប់គ្រងដោយយោធារយៈពេល ៥ឆ្នាំកន្លងទៅនេះ។ ឧត្តមសេនីយ៍ចូលនិវត្តន៍វ័យ ៦៥ឆ្នាំ ដែលត្រូវបានតែងតាំងដោយក្រុមចម្រុះគាំទ្រដោយយោធាដឹកនាំដោយគណបក្ស Palang Pracharath ត្រូវបានគេរំពឹងថា នឹងរក្សាតំណែងរបស់លោកក្រោមប្រព័ន្ធនយោបាយថ្មី ដែលណែនាំដោយយោធា ដែលអ្នករិះគន់និយាយថា វាមានន័យថាជាការអូសបន្លាយនូវការគ្រប់ដណ្តប់ដោយយោធាទៅលើនយោបាយថៃ។
ការបោះឆ្នោតសភាក្នុងការជ្រើសរើសនាយករដ្ឋមន្ត្រីនេះបានធ្វើឡើងក្នុងរយៈពេល ១០សប្តាហ៍បន្ទាប់ពីការបោះឆ្នោតទូទៅមួយ ដែលគណបក្សប្រឆាំងនិយាយថា ត្រូវបានគេបន្លំយ៉ាងធំធេង ដែលគាំទ្រគណបក្សគាំទ្រដោយយោធា៕
