ព្រៃវែង ៖ដោយសារតែការញៀនលេងទូរសព្ទ័ពេក ទោះអស់ថ្ម ហើយក្តី ក៌ឆ្លៀតសាកបណ្តើរ ហើយចុចលេងបណ្តើរ ធ្វើអោយ យុវតីម្នាក់បានឆក់ស្លាប់ភ្លាមៗ បន្ទាប់ពីនាងបានលេងទូរស័ព្ទបណ្តើរ បញ្ចូលថ្មបណ្តើរ។
ហេតុការណ៍នេះបានកើតឡើងកាលពីវេលាម៉ោង ៩និង១៥នាទី ថ្ងៃទី០៥ ខែមិថុនា ឆ្នាំ២០១៩ នៅចំណុចភូមិក្បាលបឹង ឃុំអំពិលក្រៅ ស្រុកស៊ីធរកណ្តាល ខេត្តព្រៃវែង។យុវតីរងគ្រោះ មានឈ្មោះធី ស្រីពេជ្រ ភេទស្រី អាយុ១៧ឆ្នាំ ជនជាតិខ្មែរ រស់នៅភូមិ.ឃុំខាងលើ។
ប្រភពពីអ្នកជិតខាង បានឲ្យដឹងថា មុនពេលកើតហេតុ យុវតីរងគ្រោះបានគេងនៅលើគ្រែក្រោមផ្ទះ ដោយបានចុចទូស័ព្ទលេងផងដែរ។ ពេលនោះស្រាប់តែផ្ទុះឆក់ ធ្វើឲ្យយុវតីរងគ្រោះប្រកាច់ស្លាប់ភ្លាមៗ ហូរឈាមតាមមាត់ គួរឲ្យរន្ធត់។ ភ្លាមនោះ ប្រជាពលរដ្ឋបានរាយការណ៍ប្រាប់សមត្ថកិច្ចចុះអន្តរាគមន៍ផងដែរ។
ក្រោយពីទទួលបានដំណឹង សមត្ថកិច្ចបានចុះមកដល់ផ្ទះកើតហេតុ ហើយបានពិនិត្យ និងធ្វើកោសល្យវិច័យសាកសព ហើយបានបញ្ជាក់ថា យុវតីរងគ្រោះបានបញ្ជូលថ្មទូរស័ព្ទ ដោតនិងព្រីភ្លើង ហើយលេងទូរស័ព្ទ សាកបណ្តើរនិងលេងបណ្តើរ បណ្តាលឱ្យឆ្លងចរន្តភ្លើង ហើយក៏ឆក់ស្លាប់នៅលើផ្ទះរបស់ខ្លួនឯង។
បច្ចុប្បន្នសមត្ថកិច្ចបានប្រគល់សាកសពយុវតីរងគ្រោះឲ្យក្រុមគ្រួសារ យកទៅធ្វើបុណ្យតាមប្រពៃណី៕
