ឧប្បទេវហេតុធ្លាក់យន្តហោះដឹកអ្នកដំណើរដ៏គួររន្ធត់មួយរបស់រុស្ស៊ី បានបណ្តាលឲ្យមនុស្សស្លាប់ និងរបួសរាប់សិបនាក់ ពេលដែលយន្តហោះ បានហោះទៅបុកចំហៀងអគារស្តារលូ ស្ថិតនៅទីក្រុង Nizhneangarsk តំបន់ស៊ីបេរីខាងកើត ប្រទេសរុស្ស៊ី ។
ជើងហោះហើររបស់ក្រុមហ៊ុនអាកាសចរណ៍ Angara Airlines ដែលកំពុងធ្វើដំណើរឆ្ពោះទៅកាន់ទីក្រុង Ulan Ude បានបង្ខំចុះចតបន្ទាន់ ប៉ុន្តែបែរជាផុតផ្លូវរត់ចម្ងាយ ១០០ម៉ែត្រ ហើយបានជ្រុលទៅបុកអគាររោងចក្រស្តារលូ បណ្តាលឲ្យមនុស្ស២នាក់ស្លាប់។
កាសែត Russia Today បានរាយការណ៍ថា មនុស្ស២នាក់ដែលបានបាត់ជីវិតនោះ គឺជាសមាជិកអាកាសយានិកតែម្តង។ មនុស្ស៧នាក់ផ្សេងទៀត នៅលើយន្តហោះ ត្រូវបានបញ្ជូនទៅកាន់មន្ទីរពេទ្យ ខណៈដែលមនុស្ស៤៣នាក់ផ្សេងទៀត ត្រូវបានជួយសង្គ្រោះ។
លោកអាឡេចស៊ី ហ្វីសេវ គឺជាអ្នកនាំពាក្យសាធារណរដ្ឋ Buryatia នៃតំបន់ស៊ីបេរី ជាកន្លែងដែលឧប្បទេវហេតុធ្លាក់យន្តហោះបានកើតឡើងនោះ បានពន្យល់ថា ម៉ាស៊ីនមួយរបស់យន្តហោះបានខូច ពេលដែលយន្តហោះ ហោះឡើង ហើយក្រុមពីឡុត ក៏សម្រេចចិត្តវិលត្រឡប់មកកាន់អាកាសយានដ្ឋានវិញ។
ក្រុមហ៊ុន Angara Airlines គឺជាក្រុមហ៊ុនអាកាសចរណ៍ក្នុងស្រុកដ៏សំខាន់មួយរបស់រុស្ស៊ី ដែលភាគច្រើនគឺហោះហើរទៅកាន់តំបន់ស៊ីបេរីខាងកើត ប៉ុន្តែពេលខ្លះក្រុមហ៊ុននេះក៏បានហោះហើរអន្តរជាតិផងដែរ ទៅកាន់ទីក្រុងភាគពាយព្យ Manzhouli របស់ប្រទេសចិន ចេញពីទីក្រុង Irkutsk ។
ការហោះហើរចេញពីទីក្រុង Nizhneangarsk ទៅកាន់ទីក្រុង Ulan Ud ត្រូវការចំណាយពេល៦ម៉ោង និង៥៥នាទី ដោយមានការឈប់សំចតនៅទីក្រុង Irkutsk ។
ប្រភពព័ត៌មាន បានឲ្យដឹងថា អ្នកស្លាប់ទាំង២នាក់នោះ គឺជាកាពីទែន និងជាងម៉ាស៊ីន។
សូមបញ្ជាក់ថា សោកនាដកម្មធ្លាក់យន្តហោះនេះ បានកើតមានឡើងរយៈពេល១ខែប៉ុណ្ណោះ ក្រោយពេលមនុស្ស៤១នាក់ បានស្លាប់ក្រោយពេលដែលយន្តហោះ Aeroflot រងកាវាយប្រហារដោយផ្គររន្ទះ និងផ្ទុះចេញជាអណ្តាតភ្លើង៕