បង្គួយយក្សដែលបានត្រាច់ចរគ្រប់ទីនៅលើផែនដី កាលពីរយៈពេល៣០០លានឆ្នាំមុន ត្រូវបានក្រុមអ្នកវិទ្យាសាស្ត្រ បានធ្វើឲ្យវារស់ឡើងវិញ ជាបង្គួយយន្ត។
សត្វចម្លែកមួយក្បាលនេះ ត្រូវបានគេធ្វើឲ្យរស់ឡើងវិញ ដោយប្រើប្រាស់បច្ចេកទេសដូចក្នុងហូលីវូដ ។ សត្វប្រភេទនេះ បានដើរត្រាច់ចរគ្រប់ទីកន្លែងនៅលើផែនដីយើង តាំងពីមុនសម័យយុគទឹកកករបស់សត្វដាយណូស័រទៅទៀត។
ក្រុមអ្នកវិទ្យាសាស្ត្រ បានប្រើប្រាស់ហ្វូស៊ីលធ្វើឲ្យសត្វចម្លែកនេះមានទម្រង់ជាឌីជីថល បន្ទាប់មកធ្វើឲ្យវាមានចលនា និងបម្លែងវាទៅជាសត្វបង្គួយមានជីវិត។
ទីភ្នាក់ងារព័ត៌មាន SWNS របស់អង់គ្លេស បានរាយការណ៍ថា សត្វចម្លែកមួយនេះ មានឈ្មោះ OroBOT ដែលឈ្មោះរបស់វាដាក់ពីក្រោយឈ្មោះរបស់វា Orobates pabsti ។ វាគឺជាការសិក្សាស្រាវជ្រាវលើកដំបូងលើសត្វចម្លែកមួយនេះ ហើយវានឹងអាចនាំឲ្យការពិសោធន៍លើសត្វចម្លែកផុតពូជដ៏ទៃជាច្រើន ទៀត ហើយក្នុងនោះ សត្វដំរីរោមក្រាស់ អាចនឹងត្រូវធ្វើឲ្យមានជីវិតឡើងវិញផងដែរ តាមវិធីសាស្ត្រស្រដៀងគ្នានេះ។
បង្គុយយក្ស Orobates គឺជាថនិកសត្វ ហើយមានខ្សែស្រឡាយដូចជា ថ្លែន ពស់ អណ្តើក ក្រពើ បក្សី និងថនិកសត្វផ្សេងទៀត។ វាមានជើង៤ធំៗ ប្រវែងប្រហែល៥ហ្វ៊ូត ប៉ុន្តែមានទម្ងន់ត្រឹមតែ៩ផោនប៉ុណ្ណោះ ហើយវាមានទម្ងន់ប្រហាក់ប្រហែលនឹងរាងកាយរបស់មនុស្សយើងដែរ។ វាមានដងខ្លួនវែង និងកន្ទុយវែង ប៉ុន្តែជើងខ្លីៗ ហើយនិងមានលលាដ៏ក្បាលតូច ជាហេតុធ្វើឲ្យក្រុមអ្នកវិទ្យាសាស្ត្រ បានប្រៀបប្រដូចវាទៅនឹងសត្វក្រពើ។
ការសិក្សាថ្មីនេះដែរ វាអាចនឹងផ្តល់ជូននូវគន្លឹះដ៏សំខាន់ ក្នុងការយល់កាន់តែច្បាស់ពីប្រវត្តិនៃសត្វជើង៤រស់នៅលើដី។
លោកវេជ្ជបណ្ឌិត John Nyakatura វិស្វករជីវមេកានិក និងជាអ្នកនិពន្ធអត្ថបទ Nature បាននិយាយថា ដោយមានអាយុកាលជិត៣០០លានឆ្នាំមុន បង្គួយផុតពូជ Orobates គឺជាសត្វដ៏សំខាន់សម្រាប់ការយល់ដឹងកាន់តែច្បាស់ពីការវិវត្តន៍ទៅរបស់សត្វមានឆ្អឹងកងខ្នងរស់នៅលើដី។
លោកបន្តថា វាតំណាងឲ្យអម្បូរសត្វ ដែលឈានទៅរកអម្បូរសត្វថ្លែន ពស់ អណ្តើក ក្រពើ បក្សី និងថនិកសត្វ នាសម័យទំនើប គឺជាអម្បូរសត្វដែលបានប្រែក្លាយជាឯករាជ្យពីក្នុងទឹក ហើយបន្ទាប់មកលូតលាស់នៅក្នុងពងលើដី។
យោងតាមការអះអាងរបស់លោក Nyakatura បានឲ្យដឹងថា បង្គួយចម្លែក Orobates មានទំនាក់ទំនងគ្នារវាងថលជលិក(សត្វដែលរស់នៅក្នុងទឹកក៏បានលើគោកក៏បាន) ល្មូន និងថនិកសត្វ៕
