គ្រាប់បែកអ៊ីដ្រូហ្សែន Soviet RDS-220 ដែលនៅលោកខាងលិចស្គាល់ថាជាគ្រាប់បែក Tsar Bomba គឺជាស្តេចគ្រាប់បែកនុយក្លេអ៊ែរដ៏ខ្លាំងបំផុតមិនធ្លាប់ដែលមាននៅលើពិភពលោក។ វាគឺជាគ្រាប់បែកដែលមានកម្លាំងខ្លាំងបំផុតមិនធ្លាប់ដែលផលិតឡើង ហើយធ្លាប់សាកល្បងតែម្តងគត់។
ស្តេចគ្រាប់បែក Tsar Bomba ផលិតដោយអ្នកប្រាជ្ញសូវៀតមួយក្រុម ក្រោមការដឹកនាំរបស់ម្ចាស់ជ័យលាភីពានរង្វាន់ណូបែលសន្តិភាព គឺលោក ANDREI SAKHAROV ។ ថ្ងៃទី៣០ តុលា ឆ្នាំ១៩៦១ គ្រាប់បែកដែលមានកម្លាំងប្រមាណជា៥០មេហ្គាតោន (១មេហ្កាតោនស្មើ១លានតោន) ឬខ្លាំងជាងគ្រាប់បែកទម្លាក់នៅទីក្រុងហ៊ីរ៉ូស៊ីម៉ា ប្រមាណជាជាង៣៥០០ដងនេះ ត្រូវបានសាកល្បងដោយជោគជ័យនៅលើទីតាំងសាកល្បង NOVAIA ZEMLIA ស្ថិតក្នុងតំបន់មហាសមុទ្រអាក់ទិក របស់រុស្ស៊ី។ ដុំផ្សែងមូលបាញ់ទៅលើមានកម្ពស់៩,៦គីឡូម៉ែត្រ និងផ្សែងសាយភាយបានចម្ងាយ៥៦គ.ម។
ការសាកល្បងនេះជាផ្នែកមួយនៃការស្រាវជ្រាវធំៗ តាមបញ្ជារបស់ចូសេប ស្តាលីន មេដឹកនាំអតីតសហភាពសូវៀត កាលពីថ្ងៃទី២០ សីហា ឆ្នាំ១៩៤៥ ក្រោយបញ្ចប់សង្គ្រាមលោកលើកទី២រួចមកនោះ ដែលសំដៅផលិតគ្រាប់បែកនុយក្លេអ៊ែររបស់សហភាពសូវៀត ហើយឱ្យទទួលបានតុល្យភាពកម្លាំងនុយក្លេអ៊ែរ ជាមួយសហរដ្ឋអាមេរិក ដែលមានអាវុធនុយក្លេអ៊ែររួចជាស្រាប់ហើយនោះ។
ស្តេចគ្រាប់បែក TSAR BOMBA មានប្រវែង៨ម៉ែត្រ ទម្ងន់២៥តោន ជាគ្រាប់បែកនុយក្លេអ៊ែរដែលខ្លាំងបំផុតក្នុងប្រវត្តិសាស្ត្រ និងជានិមិត្តរូបនៃសម័យកាលអភិវឌ្ឍន៍ដែលពួកសូវៀត និងអាមេរិកវាស់ស្ទង់កម្លាំងគ្នាខាងគ្រាប់បែកនុយក្លេអ៊ែរ ហើយស្តេចគ្រាប់បែកនុយក្លេអ៊ែរដ៏ខ្លាំងនេះដែរ ត្រូវបានគេយកមកដាក់តាំងបង្ហាញជាលើកដំបូងនៅក្រុងមូស្គូ ។
ការសាកល្បងកាលពីឆ្នាំ១៩៦១ បានបង្កើតឲ្យមានទាំងមោទនភាព និងការភ័យខ្លាច ហើយការតាំងបង្ហាញគ្រាប់បែកនុយក្លេអ៊ែរខ្លាំងនៅក្បែរកំពែងវិមានក្រឹមឡាំងនេះ គឺចង់បញ្ជាក់ពីប្រវត្តិដ៏ខ្លាំងក្លានៃថាមពលនុយក្លេអ៊ែររុស្ស៊ី ប៉ុន្តែគ្រាប់បែកដែលយកមកដាក់តាំងនេះ តាមពិតគេយករំសេវនុយក្លេអ៊ែរចេញអស់ហើយ ៕
Home ព្រឹត្តិការណ៍ថ្មីៗ ស្តេចគ្រាប់បែកមហាប្រល័យមានតែមួយគត់លើលោក Tsar Bomba របស់អតីតសហភាពសូវៀត