កាលពីថ្ងៃព្រហស្បត្តិ៍ តំបន់ Southern California របស់សហរដ្ឋអាមេរិក បានទទួលរងការរញ្ជួយដីដ៏ខ្លាំងបំផុតមិនធ្លាប់មាន ក្នុងរយៈពេល២ទសវត្សរ៍កន្លងមកនេះ ។
ការរញ្ជួយដីកម្រិត៦.៤រ៉ិចទ័រ បានកើតមានឡើងនៅជិតទីក្រុងរីដហ្គេក្រេស ដែលមានចម្ងាយប្រហែល២៥០គ.មភាគឦសាន ទីក្រុងឡូសអាន់ជឺឡេស។
ក្រុមភ្នាក់ងារពន្លត់អគ្គីភ័យ បានផ្តល់ជំនួយថ្នាំពេទ្យ និងទប់ស្កាត់អគ្គីភ័យនៅក្នុង និងជុំវិញទីក្រុងនាថ្ងៃសុក្រនេះ ហើយប្រជាជននៅតំបន់វាលខ្សាច់ម៉ូចាវ និងតំបន់ឆ្នេរសមុទ្រប៉ាស៊ីហ្វិក បានរាយការណ៍ថា ពួកគេមានអារម្មណ៍ថា មានភាពរំញ័របង្កឡើងដោយសារតែការរញ្ជួយដី ដែលបានកើតមានឡើងនៅចំថ្ងៃទិវារឯករាជ្យជាតិអាមេរិក ។
លោកសាស្រា្តចារ្យ ចន រ៉ុនដល គឺជាភូគព្ភវិទូក្នុងស្រុកមួយរូប បាននិយាយប្រាប់ BBCថា មាននូវផលប៉ះពាល់ធ្ងន់ធ្ងរនៅទីក្រុងរីដហ្គេក្រេស ដែលសណ្តូកតាមតំបន់កំណុំរញ្ជួយដីភាគនិរតី។
លោកបន្តថា វាពិតជាសំខាន់ខ្លាំងណាស់ ដែលគ្រោះរញ្ជួយដីនេះ បានកើតមានឡើងឆ្ងាយពីតំបន់ដែលមានមនុស្សរស់នៅច្រើនកុះករ បើពុំដូច្នោះទេ មិនដឹងជាមនុស្សស្លាប់ និងរបួសប៉ុន្មាននាក់នោះទេ។
លោកបានបញ្ជាក់ថា ផ្លូវបានប្រេះ និងបែកក្រហែង ហើយបង្គោលភ្លើងអគ្គិសនី បានធ្លាក់ដល់ដី ក្រោយការរញ្ជួយដី ដែលបានធ្វើកញ្ចក់អគារបែក និងជញ្ជាំងអគារប្រេះផងដែរ។
ដោយឡែក លោកប្រ៊ែដ អាឡិចហ្សាន់ដឺ គឺជាអ្នកនាំពាក្យការិយាល័យសេវាកម្មសង្គ្រោះបន្ទាន់នៃរដ្ឋបាលរដ្ឋកាលីហ្វ័រញ៉ា បាននិយាយកាលពីថ្ងៃព្រហស្បត្តិ៍ថា រថយន្តពន្លត់អគ្គីភ័យ ហើយនិងក្រុមរុករក និងជួយសង្គ្រោះ ត្រូវបានដាក់ពង្រាយទៅកាន់ទីក្រុងរីដហ្គេក្រេត ជាកន្លែងដែលលោកជឿថា មានអគារជាច្រើន បានឆាបឆេះឡើង។
លោកបានធ្វើការក្រើនរំឭកថា អាចនឹងមានការរញ្ជួយដីបន្ថែមទៀតកើតឡើងនៅទីនោះ ហើយយើងបានត្រៀមខ្លួនរួចរាល់ដើម្បីជួយដល់ពួកគេ។
ខណៈពេលនោះដែរ អភិបាលរដ្ឋកាលីហ្វ័រញ៉ា លោកហ្គាវីន ញូវសាំ បានប្រកាសអាសន្ននៅក្នុងតំបន់ដែលរងគ្រោះដោយសារការរញ្ជួយដី ស្របពេលមានក្តីកង្វល់ពីរលករញ្ជួនតាមក្រោយ៕
Home ព្រឹត្តិការណ៍ថ្មីៗ តំបន់ Southern California រងគ្រោះដោយសារការរញ្ជួយដីដ៏ខ្លាំងក្លាបំផុតមិនធ្លាប់ដែលមានក្នុងរយៈពេល២ទសវត្សរ៍