កាលពីពេលកន្លងទៅនេះ នគរបាលស្នងការរាជធានីភ្នំពេញ បានជួយអន្តរាគមន៍ជនរងគ្រោះម្នាក់ ដែលត្រូវបានគេស្គាល់នាងថា គឺតារា Facebook like លក់ឡេ ឈ្មោះ ថៃ ស្រីនាង ត្រូវបានបុរសជាសង្សារវាយឲ្យរបួស ស្ថិតនៅសង្កាត់បឹងកក់១ ខណ្ឌទួលគោក រាជធានីភ្នំពេញ។
លោក សុខ ហេង អធិការនគរបាលខណ្ឌទួលគោក បានប្រាប់បណ្តាញព័ត៌មាន ក្នុងស្រុកមួយថា បន្ទាប់ពីទទួលបានពាក្យបណ្តឹង របស់ស្ត្រីរងគ្រោះរួចហើយនោះ នៅពេលនេះ សមត្ថកិច្ចនគរបាលកំពុងបន្តស្រាវជ្រាវ ដើម្បីស្វែងរកឃាត់ជនខ្លួនបុរសដៃដល់ ដែលវាយស្ត្រីសិចស៊ីលក់ផលិតផលតាម Facebook ឈ្មោះ ថៃ ស្រីនាង។
ជុំវិញករណីខាងលើនេះ មានការលើកឡើងរបស់មហាជនមួយចំនួនថាសមត្ថកិច្ចទៅទទួលពាក្យបណ្តឹងដល់បន្ទប់ដេកផ្ទាល់តែ ម្តង ។ ប៉ុន្តែខាងអាជ្ញាធរ បានបញ្ជាក់ថាករណីនេះដោយសារតែស្ត្រីរងគ្រោះអស់កម្លាំងខ្លាំង មិនអាចចេញពីផ្ទះទៅដាក់ពាក្យបណ្តឹងបាន ទើបស្ត្រីរងគ្រោះសំណូមពរ ឲ្យសមត្ថកិច្ចជួយធ្វើពាក្យបណ្តឹងនៅក្នុងបន្ទប់ដេករបស់គាត់។
គួរបញ្ជាក់ដែរថា បើតាមការអះអាងរបស់ជនរងគ្រោះបានលើកឡើងថា ជនបង្កជាតែងតែហិង្សារហូតលើរូបនាងជិត ១៣០ដង ហើយ ថៃ ស្រីនាង បានរងរបួសលើផ្ទៃមុខយ៉ាងដំណាំ ដោយនាងបានអះអាងក្នុង Facebook ថា ត្រូវបុរសជាសង្សារវាយធ្វើបាបជាញឹកញយ មិនតិចជាង១៣០ដងទេ ចាប់តាំងពីស្គាល់គ្នាមក។ ការប្រើអំពើហិង្សារនេះ បានធ្វើឲ្យអ្នកលេង Facebook នាំគ្នារិះគន់លើជនបង្ក ដែលវាយធ្វើបាបស្ត្រីទន់ខ្សោយ៕
