អាចន៌ផ្កាយដែលមានទំហំប៉ុនបាល់ទាត់ បានធ្លាក់លើវាលស្រែស្ថិតនៅភូមិមួយកន្លែងនៅភាគខាងកើតប្រទេសឥណ្ឌា។
ការិយាល័យគណៈរដ្ឋមន្ត្រីរដ្ឋប៊ីហា បាននិយាយនៅក្នុងសេចក្តីថ្លែងការណ៍ថា អាចន៍ផ្កាយដែលធ្លាក់ក្នុងភូមិ Mahadeva ស្ថិតនៅក្នុងរដ្ឋប៊ីហានេះ មានទម្ងន់ជិត១៣គ.ក ត្រូវបានគេរកឃើញថា នៅមានកម្លាំងម៉ាញ៉េទិកនៅឡើយ។
រូបភាពដែលបានបង្ហាញឃើញ ក្រុមអ្នកភូមិឈរនៅជុំវិញប្រហោងដ៏ធំមួយក្នុងវាលស្រែ ដែលបង្កឡើងដោយសារតែអាចន៍ផ្កាយនេះ។
លោក Nitish Kumar គឺជាប្រធានគណៈរដ្ឋមន្ត្រីរដ្ឋប៊ីហា បាននិយាយថា បច្ចុប្បន្ន អាចន៍ផ្កាយនេះ បានដាក់បង្ហាញនៅឯសារមន្ទីរប៊ីហា ប៉ុន្តែវានឹងត្រូវបញ្ជូនទៅកាន់មន្ទីរវិទ្យាសាស្ត្រ Srikrishna ស្ថិតនៅក្នុងរដ្ឋប៊ីហា សម្រាប់ការវិភាគ ដើម្បីបញ្ជាក់ថាតើវាគឺជាអាចន៍ពិតប្រាកដ ឬយ៉ាងណា។
ថ្វីត្បិតតែវាអាចមើលឃើញដូចជាដុំថ្មធម្មតាពិតមែន តែអាចន៍ផ្កាយមានទម្ងន់ធ្ងន់ជាងថ្មហើយមានស្នាមឆេះខាងក្រៅ ហើយវាមានកម្លាំងម៉ាញ៉េទិកទៀតផង។
លោក Steven Ehlert គឺជាអ្នកស្រាវជ្រាវនៅឯការិយាល័យអាចន៍ផ្កាយរបស់អង្គការ NASAបាននិយាយប្រាប់ CNNថា អាចន៍ផ្កាយគឺជាចំណាប់អារម្មណ៍ដ៏អស្ចារ្យមួយសម្រាប់ក្រុមអ្នកស្រាវជ្រាវ ដោយសារតែវាជួយពួកយើងឲ្យយល់កាន់តែច្បាស់ពីការបង្កើតរូបរាង និងការវិវត្តន៍នៅក្នុងប្រព័ន្ធព្រះអាទិត្យ។
យោងតាមអង្គការ NASA អាចន៍ផ្កាយ គឺជាថ្មអវកាសដ៏វិសេស អាចជាបំណែករបស់ផ្កាយដុះកន្ទុយ ឬផ្កាយព្រះគ្រោះ ដែលកំពុងគោចរណ៍នៅតាមគន្លងព្រះអាទិត្យក្នុងទីអវកាស។ វានឹងក្លាយជាអាចន៍ផ្កាយ ពេលដែលវាចូលក្នុងបរិយាកាសផែនដី និងឆេះជាដុំភ្លើងឡើង។ អាចន៍ផ្កាយ នឹងធ្វើដំណើរឆ្លងកាត់បរិយាកាស មុនពេលវាធ្លាក់មកលើផែនដី៕