កាលពីថ្ងៃចន្ទម្សិលមិញនេះ ទីក្រុងប៉េកាំង បានបញ្ជាក់យ៉ាងច្បាស់ដល់ហុងកុង ថា ការវិលត្រឡប់មកគោរពច្បាប់ និងសណ្តាប់ធ្នាប់វិញ គឺជាអាទិភាពបំផុត ហើយនិងបានស្ងើចសរសើរយ៉ាងខ្លាំង ដល់ក្រុមនគរបាលទីក្រុងមួយនេះ ក្នុងការបង្ហាញការគាំទ្រពុំធ្លាប់ដែលមានពីមុនមករបស់ពួកគេ ថ្វីត្បិតតែមានការរិះគន់ជាសាធារណៈចំពោះការចោទប្រកាន់ថាបានប្រើប្រាស់កម្លាំងហួសហេតុមកលើក្រុមបាតុករប្រឆាំងនឹងរដ្ឋបាលហុងកុងក៏ដោយ។
ចិនបានធ្វើការព្រមានផងដែរថា ពីគោលជំហរមិនអត់ឱនចំពោះការជ្រៀតជ្រែកណាមួយពីបរទេស។
ការិយាល័យទទួលកិច្ចការនៅហុងកុង និងម៉ាកាវ ក្រោមក្រុមប្រឹក្សារដ្ឋនៃគណៈរដ្ឋមន្ត្រីចិន បានប្រើពាក្យធ្ងន់ៗដើម្បីឆ្លើយតបជាលើកដំបូងចំពោះភាពរំជើបរំជួលកើនឡើងនៅក្នុងទីក្រុងហុងកុង ចាប់តាំងពីខែមិថុនារហូតមក ដែលបង្កឡើងដោយសារតែពង្រាងច្បាប់ធ្វើបត្យាប័នជាមួយចិនដីគោកនោះ។
បំណងរបស់ចិនចង់បញ្ឈប់ភាពតានតឹង និងមើលឃើញទីក្រុងមួយនេះ វិលត្រឡប់មករកប្រក្រតីភាពវិញ ត្រូវបានបញ្ជាក់យ៉ាងច្បាស់នៅក្នុងសន្និសីទកាសែទជាលើកដំបូងរបស់ចិនស្តីពីហុងកុង ចាប់តាំងពីវាបានវិលត្រឡប់មកកាន់អធិបតេយ្យភាពទឹកដីចិនវិញ កាលពីឆ្នាំ១៩៩៧។
លោកយ៉ាង ក្វាង គឺជាអ្នកនាំពាក្យរបស់ការិយាល័យទទួលកិច្ចការនៅហុងកុង និងម៉ាកាវ បានបញ្ជាក់ឡើងវិញពីការគាំទ្ររបស់រដ្ឋាភិបាលចិនមកលើប្រធានប្រតិបត្តិហុងកុង លោកស្រី ខារី ឡាម ហើយនិងជំរុញឲ្យសាធារណជនហុងកុង ប្រឆាំងនឹងការប្រើប្រាស់អំពើហិង្សា។
ប៉ុន្តែចំណុចដ៏រសើបបំផុតនៅក្នុងសន្និសីទកាសែតរយៈពេល៤០នាទីនេះ គឺការកោតសរសើររបស់ចិនចំពោះក្រុមនគរបាលហុងកុង ដែលជំនះរាល់ការរិះគន់ពីគ្រប់ភាគីទាំងអស់ សម្រាប់ដំណោះស្រាយរបស់ពួកគេមកលើមហាបាតុកម្មប្រឆាំងនឹងរដ្ឋបាលហុងកុង។
លោកយ៉ាង បាននិយាយថា យើងបានដឹងពីសំពាធដ៏ធំដែលនគរបាលហុងកុង និងក្រុមគ្រួសាររបស់ពួកគេ កំពុងប្រឈម ហើយពួកយើងមានការដឹងគុណខ្លាំងណាស់ចំពោះក្រុមនគរបាលហុងកុង ដែលគ្មានការខ្លាចរអារក្នុងការបំពេញតួនាទីរបស់ពួកគេ ប្រឆាំងនឹងបាតុករទាំងអស់នេះ។
លោកយ៉ាង បានកត់សំគាល់ថា ហុងកុងបានឆ្លងកាត់បាតុកម្ម និងការដង្ហែរក្បួន ដែលមិនស្ងប់ស្ងាត់ ហើយវាបានធ្វើឲ្យអន្តរាយយ៉ាងខ្លាំងដល់បូរណភាព និងស្ថិរភាពរបស់ហុងកុង។
នៅពេលសួរដល់លទ្ធភាពនៃការប្រើប្រាស់កងទ័ពរំដោះប្រជាមានិតចិន លោកយ៉ាង បាននិយាយថា មូលដ្ឋាននៃការដាក់ពង្រាយកងទ័ព គឺមាននៅក្នុងច្បាប់ស្រាប់។
លោកយ៉ាង បានបញ្ចេញប្រតិកម្មផងដែរចំពោះក្រុមអ្នករិះគន់បរទេស សម្រាប់អនុសាសន៍គ្មានទំនួលខុសត្រូវ និងគួរឲ្យអស់សំណើចរបស់ពួកគេ។ លោកបានធ្វើការព្រមានថា ចិននឹងអត់ធ្មត់នោះទេចំពោះការធ្វើអន្តរាគមន៍បរទេសណាមួយនោះ៕
