កាលពីវេលាម៉ោងប្រហែល៦ និង៣០នាទីព្រឹក ថ្ងៃទី៣១ ខែកក្កដា ឆ្នាំ២០១៩ រថយន្ដមួយគ្រឿងដឹកមាន់ មកពីប្រទេសវៀតណាម បានបើកបោះពួយយ៉ាងលឿន ជ្រុលចង្កូតទៅបុករថយន្ដដឹកកម្មករកម្មការិនីយ៉ាងពេញទំហឹង ក្រឡាប់ផ្ងារជើងទ្រមេឃ បណ្ដាលឲ្យមនុស្សចំនួន៤៣នាក់រងរបួសធ្ងន់ នៅត្រង់ចំណុចក្បែរស្ថានីយមួយកន្លែង ស្ថិតក្នុងភូមិកៀនសាំង សង្កាត់ស្វាយរៀង ក្រុងស្វាយរៀង។
មុនពេលកើតមាននូវគ្រោះថ្នាក់ចរាចរណ៍នោះ គេឃើញរថយន្ដមួយគ្រឿង ចំណុះ៥តោន ដឹកមាន់រស់ មកពីប្រទេសវៀតណាម បើកបោះពួយយ៉ាងលឿន ក្នុងទិសដៅពីកើតទៅលិច បញ្ច្រាសទិសគ្នាជាមួយនឹងរថយន្ដដឹកកម្មករ ម៉ាកសាំងយ៉ុងមួយគ្រឿង ពណ៌លឿង ពាក់ស្លាកលេខ កំពង់ស្ពឺ 2A-3239 ក្នុងទិសដៅទៅកាន់ក្រុងបាវិត។ លុះពេលរថយន្ដដឹកកម្មករកម្មការិនី បើកមកដល់ចំណុចកើតហេតុ ស្រាប់តែរថយន្ដដឹកមាន់បានរេចង្កតទៅបុករថយន្ដដឹកកម្មករយ៉ាងពេញទំហឹង ក្រឡាប់ផ្ងារជើងទ្រមេឃ បណ្ដាលឲ្យមនុស្សចំនួន៣៥នាក់រងរបួស ក្នុងនោះមានបុរសចំនួន៥នាក់។
សមត្ថកិច្ចក្រុងស្វាយរៀង បានឲ្យដឹងថា បើតាមព័ត៌មានបឋមដែលសមត្ថកិច្ចទទួលបាន គឺហេតុការណ៍គ្រោះថ្នាក់ចរាចរណ៍ខាងលើនេះ មានអ្នករងរបួសចំនួន៤៣នាក់ប្រុស១០នាក់។ ប៉ុន្ដែសមត្ថកិច្ចមិនទាន់ដឹងថា របួសធ្ងន់ និងស្រាលប៉ុន្មាននាក់ នៅឡើយ ព្រោះភ្លាមៗនោះ សមត្ថកិច្ចកំពុងរវល់ បញ្ជូនអ្នករងរបួសទៅសង្គ្រោះ នៅក្នុងមន្ទីរពេទ្យ ៕
