ពេលនេះ កូរ៉េខាងជើងកាន់តែបានចិត្តខ្លាំងឡើងហើយក្រោយពួកគេ បាញ់មីស៊ីល២គ្រាប់បន្ថែមទៀតចូលទៅក្នុងសមុទ្រខាងកើត ហើយអឺរ៉ុប បានអំពាវនាវឲ្យបន្តអនុវត្តន៍ទណ្ឌកម្មដ៏តឹងរឹងបំផុតលើទីក្រុងព្យុងយ៉ាង រហូតដល់ពួកគេបោះបង់ចោលមហិច្ឆិតាមីស៊ីលបាលីស្ទិក និងនុយក្លេអ៊ែរ។
ទីក្រុងព្យុងយ៉ាង បានបាញ់មីស៊ីល២គ្រាប់បន្ថែមទៀត ដែលក្រុមមន្ត្រីកូរ៉េខាងត្បូង បាននិយាយថា វាទំនងជាប្រភេទថ្មីសន្លាងនៃមីស៊ីលរយៈចម្ងាយខ្លី។
ការបាញ់មីស៊ីលដែលបានកើតឡើងជាលើកទី៣ក្នុងរយៈពេល១សប្តាហ៍នេះ ត្រូវបានគេបាញ់ចេញពីតំបន់ឆ្នេរភាគខាងកើតកូរ៉េខាងជើង កាលពីព្រឹកថ្ងៃសុក្រ ចូលទៅក្នុងសមុទ្រខាងកើត ឬសមុទ្រជប៉ុន។
ការបាញ់មីស៊ីលជាបន្តបន្ទាប់នេះដែរ ត្រូវបានគេមើលឃើញថាជាប្រតិកម្មមួយចំពោះសមយុទ្ធយោធាតាមការគ្រោងទុករវាងកូរ៉េខាងត្បូង និងសហរដ្ឋអាមេរិក។
ចក្រភពអង់គ្លេស បារាំង និងអាល្លឺម៉ង់ បានអំពាវនាវឲ្យកូរ៉េខាងជើង ចូលរួមកិច្ចប្រជុំដ៏មានអត្ថន័យជាមួយនឹងសហរដ្ឋអាមេរិក។
ក្រោយកិច្ចប្រជុំបិទទ្វារជាមួយក្រុមប្រឹក្សាសន្តិសុខអង្គការសហប្រជាជាតិ ប្រទេសទាំងនេះ បាននិយាយថា ទណ្ឌកម្មអន្តរជាតិត្រូវការពង្រឹងឲ្យបានពេញលេញរហូតដល់ទីក្រុងព្យុងយ៉ាង បំផ្លាញចោលនូវកម្មវិធីមីស៊ីលបាលីស្ទិក និងនុយក្លេអ៊ែររបស់ខ្លួន។
យោងតាមការអះអាងពីនាយអគ្គសេនាធិការកងទ័ពចម្រុះកូរ៉េខាងត្បូង បានឲ្យដឹងថា ការបាញ់មីស៊ីលនេះដែរ បានកើតឡើងកាលពីវេលាម៉ោង២ និង៥៩នាទី យប់រំលងអាធ្រាត្រ និងម៉ោង៣ និង២៣នាទីព្រឹកទាបភ្លឺ ម៉ោងក្នុងស្រុក ចេញពីតំបន់ Yonghung ស្ថិតនៅក្នុងខេត្ត South Hamgyong ហោះចូលទៅក្នុងសមុទ្រជប៉ុន។
ពួកគេបានអះអាងថា មីស៊ីលទាំងនេះ ហោះទាបប្រហែលកម្ពស់២៥គ.មប៉ុណ្ណោះ ហើយនិងធ្វើដំណើរបាន២២០គ.ម។ ក្រុមអ្នកវិភាគ បាននិយាយថា វាទំនងជាហោះលឿនខុសពីធម្មតា។
ខណៈពេលនោះដែរ អ្នកនាំពាក្យការិយាល័យប្រធានាធិបតីកូរ៉េខាងត្បូង បាននិយាយថា មាននូវលទ្ធភាពខ្ពស់ដែលវាអាចជាប្រភេទថ្មីនៃមីស៊ីលបាលីស្ទិករយៈចម្ងាយខ្លី ស្រដៀងនឹងមីស៊ីលដែលបានបាញ់កាលពីសប្តាហ៍មុន៕
Home ព្រឹត្តិការណ៍ថ្មីៗ អឺរ៉ុបជំរុញឲ្យរឹតបន្តឹងទណ្ឌកម្មក្រោយកូរ៉េខាងជើងបាញ់មីស៊ីលជាលើកទី៣ក្នុងរយៈពេល១សប្តាហ៍