ករណីបាញ់ប្រហារទ្រង់ទ្រាយធំ២លើកនៅសហរដ្ឋអាមេរិក កាលពីចុងសប្តាហ៍កន្លងទៅ បានសម្លាប់មនុស្ស២៩នាក់ ហើយក្រុមអ្នករិះគន់មួយចំនួន បានលើកឡើងថា ប្រធានាធិបតីសហរដ្ឋអាមេរិក លោកដូណាល់ ត្រាំ ត្រូវតែមានចំណែករួមទទួលខុសត្រូវខ្លះ ជុំវិញករណីសោកនាដកម្មមួយនេះ។
ប្រធានាធិបតីសហរដ្ឋអាមេរិក លោកដូណាល់ ត្រាំ បាននិយាយថា “ការស្អប់ខ្ពើមគ្មានកន្លែងដាក់នោះទេ”នៅសហរដ្ឋអាមេរិក ក្រោយពេលដែលមនុស្ស២៩នាក់ ត្រូវបានសម្លាប់ក្នុងករណីបាញ់ប្រហារទ្រង់ទ្រាយធំ២លើកកាលពីចុងសប្តាហ៍កន្លងទៅ។
ការបាញ់ប្រហារនេះ បានកើតឡើងនៅក្នុងហាង Walmart ស្ថិតនៅក្នុងទីក្រុងអែល ប៉ាសូ រដ្ឋតិចហ្សាស់ បណ្តាលឲ្យមនុស្ស២០នាក់បាត់បង់ជីវិត ខណៈដែលមនុស្ស៩នាក់ផ្សេងទៀត បានស្លាប់អំឡុងការបាញ់ប្រហារនៅទីក្រុងដេតុន រដ្ឋអូហាយ៉ូ។
លោកត្រាំ បាននិយាយថា ប្រហែលជាត្រូវការធ្វើអ្វីបន្ថែមទៀត ដើម្បីបញ្ឈប់ការបាញ់ប្រហារបែបនេះ។
ក្រុមអ្នករិះគន់ បាននិយាយថា គាត់មានចំណែកមួយនៅក្នុងរឿងមួយនេះ ដោយពួកគេបានលើកឡើងពីគោលនយោបាយប្រឆាំងអន្តោប្រវេសន៍របស់លោក និងការជំទាស់ទៅនឹងការគ្រប់គ្រងអាវុធ។
គួរឲ្យដឹងថា បុរសស្បែកសវ័យ២១ឆ្នាំ ដែលត្រូវបានចាប់ខ្លួននៅក្នុងករណីបាញ់ប្រហារនៅរដ្ឋតិចហ្សាស់ កាលពីថ្ងៃសៅរ៍ ត្រូវបានគេជឿថា បានបង្ហោះឯកសារតាមអនឡាញ អំពាវនាវឲ្យមានការវាយប្រហារបែបនេះ ដើម្បីឆ្លើយតបនឹងការឈ្លានពានរបស់អេស្ប៉ាញមកលើរដ្ឋមួយនេះ។
ដោយឡែក មូលហេតុដែលនាំឲ្យខ្មាន់កាំភ្លើងនៅរដ្ឋអូហាយ៉ូ ដែលបានបាញ៉សម្លាប់ប្អូនស្រីរបស់ខ្លួន និងមនុស្ស៨នាក់ផ្សេងទៀត កាលពីថ្ងៃអាទិត្យ មុនពេលត្រូវបានបាញ់សម្លាប់ដោយក្រុមនគរបាល មិនត្រូវបានគេដឹងច្បាស់នោះទេ។
ថ្លែងទៅកាន់ក្រុមអ្នកសារព័ត៌មាន លោកត្រាំ បាននិយាយថា ករណីបាញ់ប្រហារទ្រង់ទ្រាយធំ ត្រូវតែបញ្ឈប់។
លោកនិយាយថា ករណីបែបនេះបានកើតមានឡើងច្រើនឆ្នាំមកហើយ គឺច្រើនឆ្នាំហើយ ច្រើនឆ្នាំទៀតនៅក្នុងប្រទេសរបស់ពួកយើង ហេតុដូច្នេះហើយ យើងត្រូវតែបញ្ឈប់វាឲ្យបាន។
លោកបាននិយាយថា ករណីបាញ់ប្រហារនេះ គឺកើតឡើងដោយសារតែបញ្ហាផ្លូវចិត្ត ខ្មាន់កាំភ្លើងទាំងអស់នេះ បានកើតរោគចិត្តក្នុងកម្រិតដ៏ធ្ងន់ធ្ងរបំផុត។
នៅរដ្ឋតិចហ្សាស់ មនុស្ស២៦នាក់ បានរងរបួស ហើយមនុស្ស២៧នាក់ទៀតបានរងរបួសនៅក្នុងរដ្ឋអូហាយ៉ូ ជាកន្លែងដែលខ្មាន់កាំភ្លើង ត្រូវបានបាញ់សម្លាប់ដោយនគរបាលដែលកំពុងល្បាតនៅតំបន់នោះ នៅប្រហែល៣០វិនាទីក្រោយមក ៕
Home ព្រឹត្តិការណ៍ថ្មីៗ លោកត្រាំត្រូវតែមានទំនួលខុសត្រូវលើករណីបាញ់សម្លាប់មនុស្ស២៩នាក់ និងរាប់សិបនាក់ផ្សេងទៀតរងរបួស នៅអាមេរិក