កាលពីពេលថ្មីៗនេះ រដ្ឋបាលរាជធានីភ្នំពេញបានសម្រេចកែសម្រួលតំបន់ក្តាន់២ឲ្យទៅជារង្វង់មូលវិញ ដើម្បីសម្រួលចរាចរណ៍ឲ្យកាន់តែងាយស្រួល ពិសេសឈានទៅកាត់បន្ថយការកកស្ទះចរាចរណ៍ ។
ក្នុងកិច្ចប្រជុំនៅសាលារាជធានីភ្នំពេញនារសៀលថ្ងៃទី១៩ ខែធ្នូ ឆ្នាំ២០១៩នេះ ភាគីពាក់ព័ន្ធបានឯកភាព កែសម្រួលលំហូរចរាចរណ៍នៅចំណុចប្រសព្វកា្តន់២ឡើងវិញ តាមរយៈការធ្វើជារង្វង់មូល តម្លើងភ្លើងស្តុបឲ្យមានភាពស៊ីសង្វាក់គ្នា និងពង្រីកទទឹងផ្លូវប្រវែង ៣ម៉ែត្រកន្លះ បន្ថែមទៀតពីមុខទីស្តីការគណៈរដ្ឋមន្ត្រី ដល់ដល់ស្ពានអាកាសតិចណូ ដើម្បីរំដោះការកកស្ទះចរាចរណ៍ឲ្យ កាន់តែមានប្រសិទ្ធភាព។
លោក ឃួង ស្រេង អភិបាលរាជធានីភ្នំពេញ បានឲ្យដឹងថា គម្រោងកែសម្រួលលំហូរចរាចរណ៍នៅតំបន់ក្តាន់២នេះ នឹងត្រូវចាប់ផ្តើមអនុវត្តន៍នៅដើមឆ្នាំ២០២០នេះ ខណៈដែលតំបន់នេះកំពុង ប្រឈមការកកស្ទះចរាចរណ៍ជារៀងរាល់ថ្ងៃ ដែលរំខានដល់ការធ្វើដំណើររបស់ប្រជាពលរដ្ឋ។
តាមរយៈការសិក្សាជាលក្ខណៈវិទ្យាសាស្ត្ររបស់ក្រុមនិស្សិត នៃវិទ្យាស្ថានបច្ចេកទេសកម្ពុជា បានបង្ហាញថា ក្នុងមួយថ្ងៃៗ មានយានយន្តប្រមាណជាង ៥ម៉ឺន ៣ពាន់គ្រឿង បានឆ្លងកាត់នៅលើផ្លូវ សហព័ន្ធរុស្ស៊ី ត្រង់ចំណុចប្រសព្វក្តាន់២ ខណៈយានយន្តជាង ៥ម៉ឺនគ្រឿងទៀត បានចេញដំណើរពីផ្លូវបឹងកក់ ឆ្លងកាត់ផ្លូវសហព័ន្ធរុស្ស៊ី ដែលធ្វើឲ្យចំណុចនេះ ប្រឈមការកកស្ទះជាប្រចាំស្ទើរពេញមួយថ្ងៃ។
គួរបញ្ជាក់ដែរថា កកស្ទះចរាចរណ៍គឺជារឿងប្រឈមរបស់យើងទាំងអស់គ្នា។ មិនមែនរឿងចរាចរណ៍នេះធ្វើឡើងតែប៉ូលិសចរាចរណ៍ទេ។ យើងត្រូវតែរួមចំណែកទាំងអស់គ្នា ពីព្រោះរឿងចរាចរណ៍នេះ វាប៉ះពាល់ទាំងអស់គ្នា ប៉ះពាល់ទាំងអាយុជីវិត ប៉ះពាល់ទាំងទ្រព្យសម្បត្តិ ផ្លូវចិត្ត សុខុមាលភាពប្រជាជន ក៏ដូចជាសុខុមាលភាពសង្គម សុខុមាលភាពសេដ្ឋកិច្ច និងបរិស្ថានផងដែរ»៕
