ភ្នំពេញ៖ យោងតាមសេចក្តីប្រកាសរបស់ក្រសួងមហាផ្ទៃដែលបានចេញនៅព្រឹកថ្ងៃ២០ ខែកញ្ញា ឆ្នាំ២០១៩នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្តីប្រកាសស្តីពី ការបង្កើត និងដាក់ឱ្យប្រើប្រាស់នូវនិមិត្តសញ្ញាខេត្តកណ្តាល ជាផ្លូវការ។
សេចក្តីសម្រេចរបស់ក្រសួងមហាផ្ទៃ បញ្ជាក់ថា និមិត្តសញ្ញាខេត្តកណ្តាល មានរាង និងរូបភាពដូចខាងក្រោម៖
- មានរាងមូល
- រង្វង់មូលមានពណ៌មាសព័ន្ធជុំវិញ៖ តំណាងឱ្យទឹកដី នៃខេត្តកណ្តាល ដែលហ៊ុព័ទ្ធជុំវិញរាជធានីភ្នំពេញ
- មហាចេតិយចំនួន៣៖ តំណាងឱ្យជាតិ សាសនា ព្រះមហាក្សត្រ និងតំណាងឱ្យអំណាចទាំង៣ របស់រដ្ឋ គឺអំណាចនីតិប្បញ្ញត្តិ អំណាចនីតិប្រតិបត្តិ និងអំណាចតុលាការ
- ព្រះសក្យមុនីចេតិយ៖ តំណាងឱ្យទីតម្កល់នូវព្រះសារីរិកធាតុ ជាទីគោរពសក្ការៈរបស់ប្រជាជនកម្ពុជា ចំពោះព្រះពុទ្ធសាសនា
- កំពូលចេតិយ៖ តំណាងឱ្យអរិយធម៌ និងភាពខ្ពង់ខ្ពស់ នៃប្រជាជាតិកម្ពុជា តាំងពីបុរាណសម័យ
- ក្បូរក្បាច់រចនា៖ តំណាងឱ្យភាពស៊ីវិល័យ ភាពរីកចម្រើន ការអភិវឌ្ឍសេដ្ឋកិច្ចសង្គម និងការប្រែក្លាយទឹកដីជនបទទៅជាទីក្រុង
- ឆ័ត្ររួត៧ជាន់៖ តំណាងឱ្យថ្ងៃទាំង៧ នៃសប្តាហ៍ និងថ្ងៃជ័យជំនៈ ៧ មករា
- ភ្នំព្រះរាជទ្រព្យ៖ តំណាងឱ្យមណ្ឌលដែនដី និងការគ្រប់គ្រងទឹកដី នៃខេត្តកណ្តាល
- ដើមឈើពណ៌បៃតង៖ តំណាងឱ្យបរិស្ថានល្អ សំបូរទៅដោយធនធានធម្មជាតិ រុក្ខជាតិគ្រប់ប្រភេទ និងភាពរីកចម្រើននៃវិស័យកសិកម្ម
- ពពក៖ តំណាងឱ្យភាពត្រជាក់ត្រជុំ សុខដុមរមនារបស់ប្រជាជនកម្ពុជា ដែលរស់នៅក្រោមដំបូល នៃសុខសន្តិភាពក្នុងទឹកដីនៃព្រះរាជាណាចក្រកម្ពុជា៕