បញ្ហា បាតុកម្មនៅហុងកុង អូសបន្លាយជាងជិតកន្លះឆ្នាំហើយ ដោយមិនមានទីបញ្ចប់នោះឡើយ ហើយបាតុកម្មវិវឌ្ឍន៍ទៅជាអំពើហិង្សា ក្រោយពេលមាននិស្សិតម្នាក់ស្លាប់នៅក្នុងការប៉ះទង្គិចជាមួយកម្លាំងសន្តិសុខ ។
មេដឹកនាំកោះហុងកុង លោកស្រី Carrie Lam បានកោះប្រជុំជាបន្ទាន់ជាមួយមន្ត្រីគ្រប់ជាន់ថ្នាក់ដើម្បីឡើងផែនការទប់ស្កាត់បាតុកម្ម។ ពេលថ្មីៗនេះលោកស្រី លឹម ក៏បានព្រមានថា នឹងឈប់បន្ធូបន្ថយដល់ក្រុមបាតុករបង្កអំពើហិង្សា ធ្វើឲ្យមានអសន្តិសុខ ក្នុងសង្គម ជាប់គាំងសេដ្ឋកិច្ចជាតិ។
នេះជារឿងដ៏កម្រដែលប៉ូលីសហុងកុងបាញ់ដោយប្រើគ្រាប់កាំំភ្លើងពិតទៅលើបាតុករ គិតចាប់តាំងពីបាតុកម្មប្រឆាំងរដ្ឋបាលហុងកុង ប្រមាណ៥ខែមកនេះ។ សកម្មភាពនៃការបាញ់ប្រហារនៅព្រឹកថ្ងៃច័ន្ទ ទី១១វិច្ឆិកា ត្រូវគេថតបាន និងបង្ហោះផ្សាយពេញបណ្តាញប្រព័ន្ធទាក់ទងសង្គម។ ក្នុងរូបវីដេអូនោះ គេឃើញប៉ូលិសមួយកំពុងតែចាប់ក្របួចកបុរសម្នាក់ ភ្លាមនោះ យុវជនម្នាក់ទៀត ពាក់ម៉ាស់បិតមុខ និងស្លៀកពាក់ខ្មៅ ដើរចូលមក ទំនងជាសំដៅចង់ប្រុងជួយគ្នារបស់គេ។ ក៏ប៉ុន្តែ រំពេចនោះ រូបគេក៏ត្រូវប៉ូលិសបាញ់ផូង ដួលភ្លាម ដោយគ្រាប់កាំភ្លើងខ្លី។ បើតាមសាក្សីនៅកន្លែងកើតហេតុ គឺគេបានឮស្នូរគ្រាប់កាំភ្លើងផ្ទុះ ចំនួនបីគ្រាប់។ ក្រោយពេលកើតហេតុ បុរសដែលដេកដួលលើដីក្នុងថ្លុកឈាម ត្រូវសមត្ថកិច្ចដឹកយកទៅសង្គ្រោះនឹងមន្ទីរពេទ្យ។ នៅខណៈនេះ គេពុំទាន់ដឹងនៅឡើយ ពីអាការរោគ ថាធ្ងន់ឬស្រាលយ៉ាងណាទេ តែអាជ្ញាធរហុងកុងគ្រាន់តែបង្ហើបប្រាប់កាសែតបារាំងAFP ថា បុរសបាតុករដែលគ្រាប់កាំភ្លើងនោះ មានវ័យ២១ឆ្នាំ។
គួរបញ្ជាក់ដែរថា ទីក្រុងហុងកុង កំពុងតែជួបនឹងវិបត្តិនយោបាយដ៏ធ្ងន់ធ្ងរ បន្ទាប់ពីមានការធ្វើបាតុកម្មទ្រង់ទ្រាយធំអស់រយ:ពេលច្រើនខែកន្លងមក ។ បាតុកម្មបានចាប់ផ្តើមដោយសារការអនុម័តច្បាប់ដ៏ចម្រូងចម្រាសមួយ ហើយវាបានរាលដាលដល់រឿងរ៉ាងដែលធំនិងធ្ងន់ជាងនេះ ។