កាលពីពេលកន្លងទៅនេះ មន្ត្រីជាន់ខ្ពស់ និងសមាជិកគណបក្សហ្វ៊ុនស៊ិនប៉ិចប្រមាណ គ្រោងតវ៉ានឹងព្រះអង្គម្ចាស់នរោត្តម ចក្រាវុឌ្ឍ ប្រធានស្តីទីគណបក្សហ្វ៊ុនស៊ិនប៉ិចទៅក្រសួងមហាផ្ទៃជុំវិញករណីបញ្ជាឲ្យសមត្ថកិច្ចបិទទីស្នាក់ការគណបក្សនេះនៅសង្កាត់ជ្រោយចង្វាររាជធានីភ្នំពេញ ខណៈមន្ត្រី ៤ រូប ទើបត្រូវបានដកចេញពីគណបក្សនេះ។
ជុំវិញបញ្ហានេះ លោក ណុប សុធារិទ្ធិ ដែលកន្លងមកមានតួនាទី ជាអ្នកនាំពាក្យគណបក្ស បានចាត់ទុកថា ជារឿងមិនត្រឹមត្រូវ មុនពេលលោកផ្ញើលិខិតចំនួនពីរ ដែលចុះហត្ថលេខា លោក ពេជ្រ សូដេថ្ថា ក្នុងតំណែងជាអគ្គលេខាធិការប្រតិបត្តិ។
«រាល់លិខិតរដ្ឋបាលកន្លងមក ដែលចុះហត្ថលេខាដោយព្រះអង្គម្ចាស់ នរោត្តម ចក្រាវុឌ្ឍ មានភាពមិនប្រក្រតី ផ្ទុយពីលក្ខន្តិកៈគណបក្ស ហើយបានបង្កឲ្យមានស្ថានភាពច្របូកច្របល់ និងការបែកបាក់សាមគ្គីភាពផ្ទៃក្នុងជាបន្តបន្ទាប់»។ នេះជាការគូសបញ្ជាក់របស់លោក ពេជ្រ សូដេថ្ថា ដោយអះអាងថា លោកមានភារកិច្ចជាសនាធិការផ្ទាល់ប្រធានគណបក្សក្នុងការគ្រប់គ្រង ដឹកនាំ បញ្ជា ត្រួតពិនិត្យរាល់សកម្មភាពការងារប្រចាំថ្ងៃ។
លោក ពេជ្រ សូដេថ្ថា បានបញ្ជាក់ថា ព្រះអង្គម្ចាស់ នរោត្តម ចក្រវុឌ្ឍ ក្នុងឋានៈជាប្រធានស្តីទី ពុំទាន់បានបំពេញនីតិសម្បទាស្របតាមការណែនាំរបស់ក្រសួងមហាផ្ទៃនៅឡើយ។KlPPTh
