សម្តេចនាយករដ្ឋមន្ត្រី ហ៊ុន សែន បើទោះបីជាសហភាពអឺរ៉ុប ដក EBA ក៏ដោយ ក៏រដ្ឋាភិបាលកម្ពុជា នៅតែមានលទ្ធភាពបើកបៀវត្សជូនមន្ត្រីរាជការដែរ។ សម្តេច បន្ថែមថា បៀវត្ស សម្រាប់បើកជូនមន្ត្រីរាជការ គឺបានមកពីការសន្សំពីប្រភពចំណូលផ្សេងៗ មិនមែនបានមកពី EBA នោះទេ។ សម្តេច ក៏បានរម្លឹកផងដែរ អំពីសមត្ថភាពរបស់រដ្ឋាភិបាលកម្ពុជា ដែលបច្ចុប្បន្ន អាចបើកបៀវត្សជូនមន្ត្រីរាជការពីរដងក្នុងមួយខែ។ សម្តេចថ្លែងបែបនេះ នៅក្នុងពិធីប្រគល់សញ្ញាបត្រដល់និស្សិតសាកលវិទ្យាល័យធនធានមនុស្សសរុបប្រមាណ២ពាន់នាក់ នាព្រឹកថ្ងៃចន្ទ នៅវិទ្យាស្ថានជាតិអប់រំ ។
សម្តេចតេជោបានបន្តទៀតថា ៖ «អ្នកខ្លះគេថា ឱ ! តិចទៀតលៀនអណ្តាតហើយ ឱ្យតែគេកាត់ EBA ស្អីលានអណ្តាត ព្រោះនេះអត់មានយកពី EBA មកទេ អត់មានយកពីអានាំចេញនាំចូលសំលៀកបំពាក់ស្អីហ្នឹងទេ ចំណូលពន្ធគយរបស់យើង បានមកពីការនាំចូល»។
សម្តេចបានបន្តថា ក្នុងចំណោមចំណូលពីការនាំចូលទាំងនោះ កន្លងទៅមានជាង៣០ភាគរយ បានមកពីរថយន្ត និងម៉ូតូ ជាង៣០ភាគរយបានមកពីប្រេងឥន្ធនៈ និង៣០ភាគរយបានមកពីទំនិញចម្រុះ ប៉ុន្តែឆ្នាំនេះចំឡែកបំផុត ដែលចំណូល៥២ភាគរយបានពីការនាំចូលឡាន និងម៉ូតូ ដែលនេះបង្ហាញថាប្រជាពលរដ្ឋខ្មែរកាន់តែមានជីវភាពល្អប្រសើរ អាចទិញរថយន្ត និងម៉ូតូបាន។
យ៉ាងណាមិញប្រមុខដឹកនាំកម្ពុជា នៅតែរក្សាគោលការណ៍ដដែល គឺមិនយកសហគមន៍អន្តរជាតិ ធ្វើជាសត្រូវនោះទេ។ ទន្ទឹមនេះ មេដឹកនាំកម្ពុជា ក៏ប្រកាសពីឯករាជ្យរបស់ខ្លួនឯងដែរថា មិនត្រូវឲ្យកម្ពុជាស្ថិតនៅក្រោមការបង្គាប់បញ្ជារបស់បរទេសណាឡើយ៕
Home ព្រឹត្តិការណ៍ថ្មីៗ សម្តេចតេជោ ៖ កម្ពុជាដាច់ខាតមិនស្ថិតនៅក្រោមការបង្គាប់បញ្ជារបស់បរទេសណាឡើយ