ក្រុមសកម្មប្រយុទ្ធ ISISជាង១ម៉ឺននាក់ដែលកំពុងជាប់គុកនៅក្នុងប្រទេសស៊ីរី កំពុងតែប្រឈមនឹងការកាត់ទោសប្រហារជីវិតនៅក្រៅប្រព័ន្ធតុលាការ ដែលក្នុងនោះរួមទាំងលោក Jihadi Jack ដែលជាសកម្មប្រយុទ្ធមកពីអង់គ្លេស។
លោកប្រធានាធិបតី បាសា អាល់ អាសាដ នឹងដកដាវអាជ្ញាសឹក ដើម្បីបង្កើតតុលាការផ្តាច់ការ ជាកន្លែងដែលអ្នកទោស នឹងត្រូវកាត់ទោសក្រោមច្បាប់ក្នុងស្រុក។
នៅក្នុងប្រទេសស៊ីរី សមាជិកក្រុម ISISនឹងត្រូវកាត់ទោសដោយការចង.ក ហើយលោកអាសាដ បានសន្យាថា អ្នកទោសបរទេសក៏មិនគេចផុតពីការដាក់ទោសស្រដៀងគ្នានេះដែរ។
ក្រុមលើកលែងទោសអន្តរជាតិ បានអះអាងថា អ្នកទោសរាប់ពាន់នាក់ ត្រូវបានកាត់ទោសប្រហារជីវិតដោយសម្ងាត់រួចទៅហើយនៅក្នុងគុក Saydnaya ខណៈដែលអ្នកទោសរាប់ពាន់នាក់ផ្សេងទៀត បានស្លាប់ដោយសារតែការធ្វើទារុណកម្ម និងការអត់អាហារនៅក្នុងគុកដ៏ឃោឃៅមួយនេះ ស្ថិតនៅជិតទីក្រុងដាម៉ាស់។
គួរឲ្យដឹងថា កងកម្លាំងប្រជាធិបតេយ្យស៊ីរីរបស់ក្រុមឃើដ ដែលបានផ្តួលរំលំក្រុម ISISដោយមានជំនួយពីកងកម្លាំងចម្រុះដឹកនាំដោយសហរដ្ឋអាមេរិកនោះ បច្ចុប្បន្នកំពុងឃុំឃាំងក្រុមជីវពល ISISជាង១ម៉ឺននាក់។
ថ្វីត្បិតតែភាគច្រើននៃពួកគេទាំងនេះ គឺជាជនជាតិស៊ីរី និងអ៊ីរ៉ាក់យ៉ាងណាក្តី ក៏ប្រហែល២ពាន់នាក់ គឺជាក្រុមសកម្មប្រយុទ្ធបរទេស ដែលរួមទាំងលោក Jihadi Jackផងដែរ ។
កាលពីខែតុលា កន្លងទៅភេរវជន Jihadi Jack ត្រូវបានគេប្រទះឃើញក្រាបចុះលើកម្រាលឥដ្ឋក្នុងគុក ដែលត្រូវបានចុះផ្សាយលើកញ្ចក់ទូរទស្សន៍ ហើយត្រូវបានមើលដោយឪពុកម្តាយរបស់គាត់។
សកម្មប្រយុទ្ធវ័យ២៣ឆ្នាំម្នាក់នេះ បានចាកចេញពីគ្រួសារវណ្ណៈកណ្តាលរបស់លោកនៅអង់គ្លេស ដើម្បីចូលរួមជាមួយក្រុម ISIS ប៉ុន្តែគាត់ត្រូវចាប់បានដោយកងកម្លាំងឃើដ ពេលដែលក្រុមភេរវកម្មមួយនេះដួលរលំទៅ។ ក្រោយការចាប់ខ្លួន លោក Jack បានសុំអង្វរវិលត្រឡប់ទៅកាន់ផ្ទះរបស់លោកវិញនៅទីក្រុង Oxfordshire ដោយលោកអះអាងថា លោកលែងមានបំណងសម្លាប់ពលរដ្ឋអង់គ្លេសទៀតហើយ។
ទោះបីជាយ៉ាងណាក៏ដោយ ឱកាសរបស់លោកនៃការវិលត្រឡប់ទៅផ្ទះវិញនៅអង់គ្លេស ទំនងជាលែងមានទៀតហើយ ក្រោយពេលដែលក្រុមឃើដ ប្រគល់ទឹកដីឲ្យលោកអាសាដ ជួយគ្រប់គ្រង ក្រោយពីត្រូវអាមេរិក បោះបង់ពួកគេចោល។
លោក Jackបាននិយាយថា រាល់ភេរវករនៅតំបន់គ្រប់គ្រងដោយរដ្ឋស៊ីរី នឹងក្លាយជាកម្មវត្ថុនៃច្បាប់ស៊ីរី ហេតុដូច្នេះហើយ ពួកយើងមិនអាចគេចផុតពីទោសប្រហារជីវិតបាននោះទេ។
សូមបញ្ជាក់ថា ប្រទេសភាគច្រើននៅអឺរ៉ុប បានបដិសេធន៍មិនព្រមទទួលយកមកវិញនូវពលរដ្ឋរបស់ពួកគេ ដែលជាសមាជិករបស់ក្រុម ISISជាដាច់ខាត ហើយសមាជិកក្រុម ISISជាជនជាតិបារាំងជាច្រើននាក់ ត្រូវបានកាត់ទោសប្រហារជីវិតនៅប្រទេសអ៊ីរ៉ាក់៕
Home ព្រឹត្តិការណ៍ថ្មីៗ រដ្ឋាភិបាលស៊ីរីដកដាវអាជ្ញាសឹកកាត់ទោសប្រហារជីវិតអ្នកទោស ISISជាង១ម៉ឺននាក់នៅក្រៅប្រព័ន្ធតុលាការ