សមត្ថកិច្ចខណ្ឌពោធិ៍សែនជ័យគ្រោងបញ្ជូនជនសង្ស័យម្នាក់ឈ្មោះ ទូច ដេវីត ទៅសាលាដំបូងរាជធានីភ្នំពេញនៅថ្ងៃនេះ បន្ទាប់ពីឃាត់ខ្លួនរឿងក្លែងឯកសណ្ឋាននគរបាលជិះម៉ូតូដេញស្ទាក់ម៉ូតូយុវជនម្នាក់សុំពិនិត្យទឹកនោម និងគំរាមយកលុយកាលពីរំលងអធ្រាត្រឈានចូលថ្ងៃទី ២៧ ខែវិច្ឆិកា នៅផ្លូវជាតិលេខ ៤ ក្នុងសង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។
យោងតាមលោក អធិការនគរបាលខណ្ឌពោធិ៍សែនជ័យ លោក យឹម សារ៉ាន់ បានឲ្យដឹងថា ជនសង្ស័យមានឈ្មោះ ទូច ដេវីត អាយុ២៤ឆ្នាំ មានមុខរបរលក់ផលិតផល តាមអនឡាញ ស្នាក់នៅម្ដុំទូលទំពូងទី២ ខណ្ឌចំការមន និងដកហូតមធ្យោបាយម៉ូតូមួយគ្រឿងម៉ាក ហុងដាឌ្រីម សង់សេ១២៥ស៊េរី០១៤ ពាក់ស្លាកលេខ ភ្នំពេញ1CU-9499 និងឯកសណ្ឋាននគរបាលពណ៌ទឹកដោះគោមួយកំផ្លេ មួកនគរបាលមួយ។ ចំណែកឯជនរងគ្រោះមានឈ្មោះ ជា សុផាន់ណាត់ អាយុ២៥ឆ្នាំ មុខរបរកម្មកររោងចក្រ ស្នាក់នៅបន្ទប់ជួលភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ។
គួររំលឹកដែរថា កម្លាំងនគរបាលប៉ុស្តិ៍ចោមចៅទី៣ នៃអធិការដ្ឋានខណ្ឌពោធិ៍សែនជ័យ បានឃាត់ខ្លួនយុវជនម្នាក់ ដែលក្លែងបន្លំស្លៀកពាក់ជាឯកសណ្ឋានជានគរបាលជាតិ ដើម្បីអុកឡុកធ្វើរឿងមិនប្រក្រតីទៅលើជនស្លូតត្រង់ ដូចជាដេញឃាត់ម៉ូតូប្រជាពលរដ្ឋនៅក្នុងមូលដ្ឋាន និងនៅខណ្ឌដ៏ទៃទៀតក្នុងរាជធានីភ្នំពេញ។
ការឃាត់ខ្លួនជនសង្ស័យក្លែងបន្លំឯកសណ្ឋាននគរបាលជាតិ បានធ្វើឡើងនៅវេលាទាបភ្លឺថ្ងៃទី២៧ ខែវិច្ឆិកា ឆ្នាំ២០១៩ នៅតាមផ្លូវជាតិ៤ ភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។