...សត្វក្អែកទឹកនៅតាមតំបន់នេសាទខ្លះ នៅក្នុងប្រទេសចិនត្រូវបានអ្នកនេសាទ ប្រើប្រាស់ជាបក្សីជំនួយនេសាទត្រី។ចំពោះការប្រើប្រាស់ក្អែកក្នុងការនេសាទត្រីមានអាយុកាលយូរលង់ណាស់មកហើយ...នៅតែរក្សាបានដល់សព្វថ្ងៃនេះ។
អ្នកថតរូបឈ្មោះ ជូលៀ វីមមឺលីនអាយុ៤២ឆ្នាំបានផ្តិតយកទិដ្ឋភាពសត្វក្អែកទឹកទុំលើក្បូនឫស្សីមុនពេលចុះទៅក្នុងទឹកដ៏ស្ងប់ស្ងាត់ដើម្បីចាប់ត្រីនៅទន្លេលីក្នុងទីក្រុងគ្វីលីន ប្រទេសចិន។ក្អែកទឹកមានចម្ពុះកោងហើយក្រាស់ដែលល្អឥតខ្ចោះសម្រាប់ចាប់ត្រីនិងជួយអ្នកនេសាទចាប់ត្រីបានច្រើនជាងអួនរបស់ពួកគេ។ជូលៀបានដាក់កាមេរ៉ារបស់នាងក្នុងស្រោមការពារទឹក មុនពេលដាក់វាទៅក្នុងទឹកបន្តិចដើម្បីថតសកម្មភាពក្អែកទឹកចុះចាប់ត្រី ខណៈអ្នកនេសាទឈរមើល។គេក៏ឃើញអ្នកនេសាទរូបនោះបោះសំណាញ់ដ៏ធំចូលទៅក្នុងទឹក នៅពេលគាត់ចង់ចាប់ត្រីតូចៗដែលហែលនៅជិតផ្ទៃទឹកផងដែរ។ជូលៀដែលរស់នៅទីក្រុងគៀវប្រទេសអ៊ុយក្រែនបាននិយាយថា“ដោយមើលឃើញពីដំណើរការទាំងមូលនិងទិដ្ឋភាពដ៏ស្រស់បំព្រង វាពិតជារំភើបខ្លាំងណាស់។ ពិតណាស់ វាស្រស់ស្អាតខ្លាំងណាស់ដល់ថ្នាក់ខ្ញុំមានអារម្មណ៍ថាវាមិនមែនជាការពិតទេ»។ខណៈការធ្វើនេសាទបែបបុរាណដោយប្រើសត្វក្អែកទឹកមានអាយុកាលតាំងពីឆ្នាំ៩៦០នៃគ.សនិងត្រូវគេគិតថាជាសិល្បៈដែលស្លាប់បាត់ទៅហើយនោះ ការនេសាទបែបនេះត្រូវបានធ្វើឱ្យរស់ឡើងវិញសម្រាប់ភ្ញៀវទេសចរ។
អ្នកនេសាទភាគច្រើនមានលិខិតអនុញ្ញាតពិសេស និង បោះជំរំនៅមាត់ទន្លេ ដើម្បីរង់ចាំអ្នកទេសចរមកទស្សនាសកម្មភាពចាប់ត្រីរបស់ពួកគេ៕
