ត្រីលឹង្គមនុស្សរាប់ម៉ឺននាក់ បានរសាត់អណ្តែតមកទើរលើឆ្នេរសមុទ្រ Drakes ក្នុងរដ្ឋកាលីហ្វ័រញ៉ា សហរដ្ឋអាមេរិកធ្វើឲ្យគ្រប់ទឹកអ្នកដែលចង់ទទួលទានវា។
ត្រីលឹង្គមនុស្សទាំងនេះ ត្រូវបានក្រុមអ្នកជំនាញជឿថា ព្យុះកាលពីពេលកន្លងទៅ បានធ្វើឲ្យពួកវាចេញពីជម្រកក្រោមបាតសមុទ្រ ហើយនិងនាំពួកវាមកទើរលើឆ្នេរ ។
ត្រីសមុទ្រដូចដង្កូវប្រវែង១០អ៊ីញទាំងនេះ មានរូបរាងដូចជាសាច់ក្រកពណ៌ស៊ីជម្ពូ ហើយនិងអាចបង្កើតរូងរាងជាអក្សរ U នៅក្នុងភក់ ឬដីខ្សាច់ក្រោមបាតសមុទ្រ ដើម្បីឲ្យសត្វសមុទ្រដ៍ទៃទៀត អាចចូលទៅនៅ ហេតុដូច្នេះហើយទើបគេដាក់រហ័សនាមឲ្យពួកវាថាជាដង្កូវម្ចាស់ផ្ទះជួល។
ត្រីលឹង្គទាំងនេះ ត្រូវបានប្រទះឃើញដោយជីវវិទូ Ivan Parrកាលពីថ្ងៃទី៦ ខែធ្នូ កន្លងទៅ ក្រោយពីមានព្យុះបោកមកលើតំបន់នោះ។
លោក Parrបាននិយាយថា អព្ភូតហេតុដ៏កម្របំផុតនេះ ត្រូវបានគេរាយការណ៍ថាធ្លាប់កើតមានផងដែរកាលពីរយៈពេលជាច្រើនឆ្នាំកន្លងទៅ នៅតំបន់ឆ្នេរ Pajaro Dunes, Moss Landing, Bodega Bay និង Princeton Harbor។
លោកនិយាយថា ត្រីលឹង្គ គឺជាប្រភេទដង្កូវស្លាបព្រា មានជើងរាងដូចវែក ដែលប្រើប្រាស់ទាំងការស៊ីចំណី និងហែលទឹក។ ពួកគវាចំណាយពេលភាគច្រើននៃជីវិតរបស់វានៅក្រោមភក់ ឬដីខ្សាច់ក្រោមបាតសមុទ្រ ហើយនិងអាចរស់បានអាយុ២៥ឆ្នាំ។
ពួកវាស៊ីបាក់តេរី ពពួកបង្គា ហើយនិងសត្វល្អិតផ្សេងៗទៀត ដែលពួកវាចាប់បាន។ ពេលពួកវាបង្កើតទម្រង់ជារូង គឺជាធម្យោបាយដ៏ងាយស្រួលមួយរបស់ពួកវា ក្នុងការចាប់ចំណី។
ក្រុមអ្នកជំនាញ បានរកឃើញភស្តុតាងពីសត្វទាំងនេះនៅក្នុងប្រវត្តិសាស្ត្រ ថាពួកវាមានអាយុកាលទាំងពីរយៈពេល៣០០លានឆ្នាំមុនមកម្ល៉េះ។
ទោះបីជាយ៉ាងណាក៏ដោយ ដោយសារតែដងខ្លួនទន់ នឹងទំហំ ធ្វើឲ្យពួកវាប្រឈមការគំរាមកំហែងច្រើន ដែលរួមទាំងភេសមុទ្រ រំពេសមុទ្រ ហើយនិងមនុស្ស ប៉ុន្តែក្រុមអ្នកជំនាញអះអាងថា ពួកគេគ្មានផលប៉ះពាល់នោះទេ ហើយនិងជាសត្វវិជ្ជមាន។
ពួកវាកម្រឃើញមាននៅសហរដ្ឋអាមេរិកណាស់ ប៉ុន្តែសម្បូរនៅកូរ៉េខាងត្បូង ជប៉ុន និងជប៉ុន។
ចំណែកឯអ្នកដែលធ្លាប់ទទួលទានត្រីលឹង្គនេះ បានអះអាងថា វាស្រួលទំពារ និងមានរស់ជាតិប្រៃផ្អែម។ គេច្រើនទទួលទានវាជាមួយទឹកជ្រលក់ ធ្វើពីប្រេងល្ង ទឹកខ្មេះ និងទឹកជ្រលក់ហិល៕
