ព្រហ្មវិហារធម៌របស់ម្តាយដែលមានទៅលើកូនៗគឺមានទំហំធំធេងណាស់មិនអាចកាត់ថ្លៃបាននោះឡើយ។ទោះយ៉ាងណាស្ត្រីជាម្តាយម្នាក់នេះដើម្បីឲ្យកូនប្រុសមានជម្រកស្នាក់នៅស៊ូទ្រាំរងាញាក់…អង្គុយលក់បន្លែនាពេលរាត្រី។លោកយាយជនជាតិចិនម្នាក់នេះ មានវ័យប្រហែល ៧០ឆ្នាំហើយ តែគាត់នៅតែស៊ូទ្រាំនឿយហត់ អង្គុយលក់បន្លែរៀងរាល់រាត្រី ដើម្បីសន្សំ លុយ ជួយ បង្គ្រប់ទិញផ្ទះឲ្យកូនប្រុស ដែលមានប្រពន្ធ មានកូន តែមិនទាន់មានផ្ទះស្នាក់នៅ ។
តាមប្រភពព័ត៌មាន ពី Stomp បានឲ្យដឹងថា ដោយសារប្រទេសចិន មានប្រជាជនច្រើន ដូចនេះហើយទើបវិស័យអចលនៈទ្រព្យមានតម្លៃខ្ពស់ ។ រយៈពេលជាង ១ខែហើយ ដែលលោក យាយរូបនេះ បានមកលក់បន្លែនៅទីក្រុង Jinan ខេត្ត Shandong រាល់យប់ ដើម្បីជួយរកលុយឲ្យកូនប្រុសទិញផ្ទះមួយកន្លែងរស់នៅដូចគេ ទោះបីជាអាកាសធាតុត្រជាក់ខ្លាំងយ៉ាងណា ក៏លោកយាយនៅតែស៊ូទ្រាំរហូតដល់ម៉ោង ១១យប់ដែរ ។ លោកយាយកំសត់រូបនេះ បាននិយាយឲ្យដឹងថា ពេលខ្លះ ដោយសារអស់កម្លាំងខ្លាំង លោកយាយបានចំណាយលុយ ៣ដុល្លារ ដើម្បីជួលតង់គេ សម្រាកមួយយប់ ហើយព្រលឹមឡើងទើបឡើងរថយន្តក្រុងទៅភូមិរបស់គាត់ ដើម្បីប្រមូលបន្លែថ្មីៗមកលក់ ហើយពេលល្ងាចលោកយាយឡើងរថយន្តក្រុងមកលក់បន្តទៀតពេលយប់។ ចំណែកប្ដីរបស់លោកយាយ ជាអ្នកជួយប្រមូលផល និងធ្វើចំការ ។ តាមប្រភពដដែលបានឲ្យដឹងថា ទង្វើរបស់លោកយាយ គឺកូនប្រុសរបស់គាត់មិនបានដឹងឡើយ ដោយគេបានរៀបការប្រពន្ធនិង មានកូនស្រីអាយុ ៤ឆ្នាំម្នាក់ ហើយសព្វថ្ងៃធ្វើការនៅទីក្រុង Weihai ភាគខាងកើតខេត្ត Shandong ។ កូនប្រុសរបស់លោកយាយ ម្នាក់នេះ ជាសិស្សបញ្ចប់ថ្នាក់ មហាវិទ្យាល័យ ដោយធ្វើការបានប្រាក់ខែប្រហែល ៥៨០ដុល្លារ ក្នុងមួយខែ ហើយសម្រាប់តម្លៃ អាផាតមែន (apartment) តូចមួយនៅក្នុងទីក្រុង Weihai គឺយ៉ាងហោចណាស់ ក៏មានតម្លៃប្រហែល ៥៨,០០០ដុល្លារអាមេរិកដែរ ដូចនេះ ពួកគេមិនអាចមានលទ្ធិភាពទិញភ្លាមៗបានទេ ។
ក្រោយពីសារព័ត៌មាន ក្នុងស្រុកមួយចំនួន បានចុះផ្សាយអំពីរឿងរ៉ាវរបស់លោកយាយ លក់បន្លែដើម្បីជួយកូនប្រុសឲ្យបានទិញផ្ទះ ហើយនោះ ដំណឹងនោះក៏បានទៅដល់កូនប្រុស បានធ្វើឲ្យអារម្មណ៍របស់គេក្ដុកក្ដួលយ៉ាងខ្លាំង ហើយនិយាយទាំងទឹកភ្នែកទៅកាន់អ្នកសារព័ត៌មានថា «ខ្ញុំពិតជាមានអារម្មណ៍តក់ស្ដុតខ្លាំងណាស់! ខ្ញុំពិតជាមិនអាចសន្សំលុយសូម្បីតែមួយសែននោះទេ! » ៕
Home សង្គមប្លែកៗ ព្រហ្មវិហារធម៌របស់ម្តាយ ស៊ូរងាញាក់ញ័រលក់បន្លែទាំងយប់ដើម្បីជួយកូនប្រុសឲ្យទិញផ្ទះបាននៅ