ក្មេងប្រុសអាយុ៨ឆ្នាំម្នាក់ ត្រូវការវះកាត់យកគ្រាប់ស្រូវចេញពីក្បាលជង្គង់ ក្រោយពីឪពុកចុងដ៏កំណាចរបស់គេ បង្ខំឲ្យលត់ជង្គង់លើគំនរស្រូវរយៈពេល៩ម៉ោង នៅប្រទេសរុស្ស៊ី។លោក Sergey Kazakov អាយុ៣៥ឆ្នាំ បានដាក់ទោសក្មេងប្រុសម្នាក់នេះ សម្រាប់ការមកផ្ទះយឺត ដោយឲ្យរូបគេលត់ជង្គង់រយៈពេល៩ម៉ោងនៅលើគំនរស្រូវ ជាហេតុធ្វើឲ្យគ្រាប់ស្រូវចូលទៅក្នុងក្បាលជង្គង់ហូរឈាមដាបរបស់ក្មេងប្រុស។
គ្រាប់ស្រូវទាំងនេះ ត្រូវបានវះកាត់យកចេញនៅឯមន្ទីរពេទ្យស្ថិតនៅក្នុងទីក្រុង Omskប្រទេសរុស្ស៊ី។ឪពុកតិរិច្ឆាន Kazakov ថែមទាំងទាត់ធាក់ក្មេងប្រុសទៀតផង និងបានបោចសក់ ពេលដែលក្មេងប្រុសកំពុងលត់ជង្គង់ ហើយម្តាយរបស់ក្មេងប្រុស អ្នកស្រី Alina Yumasheva បានសារភាពថា អ្នកស្រី បានយល់ព្រមឲ្យធ្វើទារុណកម្មបែបនេះមកលើកូនរបស់ខ្លួន។អ្នកស្រី Yumasheva បានអះអាងថា អ្នកស្រី និងលោក Kazakov បានមើលឃើញការដាក់ទោសបែបនេះនៅតាមអ៊ីនធឺណេត។ អ្នកស្រីបន្តថា គាត់បានរកឃើញដោយខ្លួនឯង ហើយនិងបានធ្វើទារុណកម្មបែបហ្នឹងមកលើកូនប្រុសរបស់គាត់។អ្នកស្រីបានបញ្ជាក់ថា គាត់បានលត់ជង្គង់នៅលើគំនរស្រូវដែរ តែវាមិនបានធ្វើឲ្យគាត់ឈឺចាប់នោះទេ។ ហេតុដូច្នេះហើយ ទើបប្តីចុងគាត់សម្រេចដាក់ទោសបែបនេះ។ទោះបីជាយ៉ាងណាក៏ដោយ ប្រភពព័ត៌មានបានបញ្ជាក់ថា ក្មេងប្រុសម្នាក់នេះ ត្រូវបានឪពុកចុងរបស់ខ្លួនបង្ខំឲ្យលត់ជង្គង់នៅលើគ្រាប់ស្រូវដែលស្រួចដូចបន្លា ហើយក្មេងប្រុសបានស្រែកយំដោយការឈឺចាប់ ពេលដែលរូបគេត្រូវបានទាត់ធាក់ដោយឪពុកចុង។
ក្រុមអ្នកស៊ើបអង្កេត បានឲ្យដឹងថា ប្តីប្រពន្ធទាំង២នាក់នេះ ថែមទាំងបង្អត់អាហារក្មេងប្រុសរយៈពេល៤ថ្ងៃទៀតផង។រឿងរ៉ាវដ៏ឈឺចាប់របស់ក្មេងប្រុស ត្រូវបានបែកធ្លាយ ពេលដែលរូបគេរត់ចេញពីផ្ទះ ហើយនិងអង្វរសុំឲ្យអ្នកចាត់ខាងស្រីម្នាក់ជួយ។ អ្នកជិតខាងម្នាក់នោះ បានទូរស័ព្ទប្រាប់ក្រុមគ្រូពេទ្យ ដោយសារតែឃើញរបួសយ៉ាងធ្ងន់ធ្ងរលើក្បាលជង្គង់ក្មេងប្រុស ដែលនៅតែហូរឈាមឥតឈប់ឈរ។បច្ចុប្បន្ន លោក Kazakov ដែលជាសហគ្រិនកម្មវិធីកុំព្យូរទ័រ និងអ្នកស្រី Yumasheva ប្រឈមនឹងការកាត់ទោសនៅទីក្រុង Omsk ៕
