ចាប់តាំងពីបច្ចេកវិទ្យាបង្កើតឡើងនូវកាមេរ៉ាសុវត្ថិភាពរឿងរ៉ាវរន្ធត់ៗជាច្រើនករណីរួចមកហើយ ប្រៀបបានជាខ្សែភាពយន្តបានបង្ហោះព្រោងព្រាតក្នុងបណ្តាញសង្គម។ដូចកាលពីពេលថ្មីៗនេះមានគណនីហ្វេសប៊ុកមួយឈ្មោះTaksin Yawrum បានបង្ហោះវីដេអូនូវហេតុការណ៏ដ៏គួរឲ្យរន្ធត់មួយគឺ មានរថយន្ដមួយគ្រឿងបានបើករេចង្កូតចូលទៅក្នុងស្ថានីយការ៉ាស់សាំងមួយកន្លែង ធ្វើឲ្យអ្នកបើកបររថយន្ដខ្ទាតចេញមកក្រៅតាមកញ្ចាក់ឡានយ៉ាងសាហាវបំផុត ហេតុការណ៏នេះត្រូវបានថតជាប់ដោយកាំមេរ៉ាសុវត្ថិភាពដែលបំពាក់លើដំបូលស្ថានីយគ្រប់ជ្រុង។
ករណីនេះបានកើតឡើង នៅក្នុងស្ថានីយប្រេងឥន្ធនៈមួយកន្លែងក្នុងឃុំប៉វិន ស្រុកស៊ីរាឆា ខេត្តឈុនបុរី ប្រទេសថៃ។ តាមការរៀបរាប់របស់អ្នកគ្រប់គ្រងស្ថានីយ បានឲ្យដឹងថា ហេតុការណ៏ទាំងនេះគឺជាករណីគ្រោះថ្នាក់ចរាចរណ៏មួយដែលនឹកស្មានមិនដល់ថាវានឹងកើតឡើង ម្យ៉ាងវិញទៀតខ្ញុំមិនចាំបាច់រៀបរាប់បន្ថែមនូវព្រឹត្តិការណ៏ទេ លោកអ្នកអាចទស្សនានូវវីដេអូកាំមេរ៉ាសុវត្ថិភាពដែលបានថតជាប់គ្រប់ជ្រុងជ្រោយតែម្ដង។ លោកបានបន្តទៀតថាក្រោយពីហេតុការណ៏គ្រោះថ្នាក់នេះបានកើតឡើង លោកបានឲ្យកូនចៅរបស់លោកធ្វើការជួយសង្គ្រោះអ្នកបើករថយន្ដដែលបានដេកសន្លប់ស្ដូកស្ដឹង ប៉ុន្តែពុំមានរបួសអ្វីធ្ងន់ធ្ងរទេ ហើយកូនចៅរបស់លោកបានយកបំពង់ពន្លត់អគ្គីភ័យទៅបាញ់លើរថយន្ដ នឹងបរិវេណជុំវិញទូចាក់សាំងព្រោះខ្លាចវាឆេះ ឬផ្ទុះដោយប្រការណាមួយ។
តាមការសាកសួរនាំពីបុរសបើករថយន្ដបានប្រាប់ឲ្យដឹងថា គាត់បានងងុយគេងមួយស្របក់ទើបធ្វើឲ្យខ្លួនបាត់បង់ស្មារតីក្នុងការបើកបរ ដែលជាហេតុបណ្ដាលឲ្យរេចង្កូតទៅចូលក្នុងស្ថានីយបែបនេះ។ ប៉ូលីសបានត្រួតពិនិត្យដើម្បីធ្វើការវាស់ជាតិអាល់កុលប៉ុន្តែរកពុំឃើញសារធាតុស្រវឹងទេ ហើយពុំមានប៉ះពាល់រងរបួសចំពោះនរណាម្នាក់ទេ ចំណែកការខូចខាតនៅក្នុងស្ថានីយគាត់ទទួលរ៉ាបរង ជួសជុលសងនូវការខូចខាតទាំងអស់ ៕
