…ក្រពើមួយក្បាលនេះពិតជាស៊យមែនទែន តែម្តងហើយ កាលពីវានៅតូចបានយកកទៅស៊កសំបកកង់ម៉ូតូ ដែលមនុស្សគ្មានសណ្តាប់ធ្នាប់បានបោះចោលទៅក្នុងទឹក ហើយសំបកកង់ម៉ូតូនោះក៏បានក្លាយទៅជាកងពាក់កដល់សព្វថ្ងៃ។ មនុស្សម្នាដែលបានប្រទះឃើញក៏កើតនូវក្តីសង្វេកជាពន់ពេក។ ខេត្តមួយស្ថិតនៅក្នុងប្រទេសឥណ្ឌូណេស៊ីកំពុងប្រកាសផ្តល់រង្វាន់ដល់អ្នកណាម្នាក់ ដែលមានភាពក្លាហានអាចដោះសំបកកង់ម៉ូតូចេញពីកក្រពើព្រៃដ៏ធំសម្បើមមួយក្បាលនេះបាន។
ក្រពើមួយក្បាលនេះត្រូវបានប្រទះឃើញកាលពីថ្ងៃទី ២២ ខែមករាឆ្នាំ ២០២០ តាមមាត់ទន្លេប៉ាលូ។យោងតាមគេហទំព័រសារព័ត៌មាន Antara របស់ឥណ្ឌូនេស៊ីបានឱ្យដឹងថា ក្រពើមួយក្បាលនេះមានប្រវែង ៤ ម៉ែត្រ បានជាប់សំបកកង់តាំងពីឆ្នាំ ២០១៦ដែលគេបានប្រទះឃើញវាហែលទឹកដំបូងតាមដងទន្លេ ប៉ាលូ ប្រទេសឥណ្ឌូណេស៊ី។ ការិយាល័យអង្គការអភិរក្សធនធានធម្មជាតិ របស់ប្រទេសឥណ្ឌូណេស៊ី បាន ប្រកាសស្វែងរកអ្នកក្លាហាន ដែលមានសមត្ថភាពអាចជួយសង្គ្រោះសត្វមួយក្បាលនេះ ប៉ុន្តែព័ត៌មានលំអិតនៃរង្វាន់ថានឹងត្រូវផ្តល់ជូនប៉ុន្មានគេនៅមិនទាន់ដឹងច្បាស់នៅឡើយទេ។
គួររម្លឹក ផងដែរថា កាលពីឆ្នាំ២០១៨ លោក Muhammad Panji ដែលមកពីក្រុមអ្នកជួយសង្គ្រោះសត្វព្រៃធ្លាប់បានព្យាយាមជួយសង្គ្រោះក្រពើមួយក្បាលនេះ ប៉ុន្តែមិនទទួលបានជោគជ័យហើយប៉ុន្មានក្រោយមកទៀតការិយាល័យអភិរក្សបានព្យាយាមប្រើសាច់ដើម្បីទាក់ទាញសត្វក្រពើនេះ ប៉ុន្តែនៅតែទទួលបរាជ័យ៕
