ដោយសារតែប្រញាប់កើតមាននូវភ្លើងកំហឹងនៅក្នុងខ្លួនពេកទើបលោកថៅកែហ្គារ៉ាស់សាំងPTTម្នាក់នេះភ្លេចគិតទៅដល់ពាក្យ«ស្តាប់មិនទាន់ជាក់ច្បាស់ កុំអាលញាក់ចិញ្ចើម»ក៏បានបញ្ជារកូនចៅចាប់វាយលោកគ្រូបង្រៀនម្នាក់រងរបួសយ៉ាងដំណំហើយថែមទាំងថតបង្ហោះរូបយ៉ាងឡូយទៀតផង ហើយនៅពេលនេះប្រៀបបានកាំបិទចិតផងឯង។សម្លេងរិះគន់លាន់ឬយ៉ាងកក្រើកព្រមជាមួយនូវសំណូមពរទៅដល់សមត្ថកិច្ចប៉ូលិសឲ្យកសាងសំណុំរឿងជើងរន្ទះនេះទៅតុលាការទៀតផង។ នៅព្រឹកថ្ងៃទី១៩ ខែធ្នូ ឆ្នាំ២០១៩ សំណុំរឿងចៅកែស្ថានីយ៍ប្រេង PTT នៅជិតរង្វង់មូលគួរស្រូវខណ្ឌដង្កោ និងកូនចៅ នាំគ្នាប្រើអំពើហិង្សាយ៉ាងចាស់ដៃទៅលើគ្រូបង្រៀនម្នាក់ រហូតផ្ទុះការរិះគន់ពេញបណ្ដាញសង្គម Facebook នោះ ត្រូវបានបញ្ជូនទៅអយ្យការអមសាលាដំបូង រាជធានីភ្នំពេញ ដើម្បីចាត់ការបន្ដតាមច្បាប់។រឿងរ៉ាវផ្តើមឡើងដោយថៅកែស្ថានីយ៍ប្រេង PTT ស្ថិតនៅតាមផ្លូវជាតិ លេខ២ ក្បែររង្វង់មូលគួរស្រូវ ក្នុងខណ្ឌដង្កោ និងកូនចៅ បានព្រួតវាយទៅលើបុរសម្នាក់ឡើងចាស់ដៃដោយចោទថា បុរសរូបនេះបានចូលទៅក្នុងបន្ទប់ស្រី ហើយលួចថតស្រីៗដែល បានចូលបត់ជើង។ហេតុការណ៍នេះ បានកើតឡើងកាលពីយប់ថ្ងៃទី១៦ ខែធ្នូ ឆ្នាំ២០១៩ នៅពេលដែលលោក សារុន វិធុរៈ ថៅកែហ្គារ៉ាស់សាំង PTT បានបង្ហោះវីដេអូមួយ ដោយបង្ហាញមុខបុរសម្នាក់ជាមួយស្នាមបែកមុខចេញឈាម អមដោយមានកូនចៅរបស់ថៅកែ ស្ថានីយ៍ប្រេងចាប់ចងដៃទៅក្រោយ និងចាប់បោចសក់ឡើងទៀតផង។
នៅក្នុងវីដេអូនោះលោក សារុន វិធុរៈ បានអះអាងថា នៅពេលនេះលោកបានចាប់ជនពាលម្នាក់ ដោយមានគេជួលមកអុកឡុកកន្លែងស្ថានីយ៍ប្រេងរបស់លោក និងបានលួចចូលទៅក្នុងបន្ទប់ស្រី ដើម្បីថតរូបមនុស្សស្រីចូលក្នុងបន្ទប់បត់ជើង។ ចំពោះវីដេអូមួយនេះ មានការបកស្រាយពេញបណ្តាញសង្គម Facebook ផ្សេងៗពីគ្នាថា ថៅកែរូបនេះបានធ្វើត្រូវដោយចាប់ជនល្មើស ដែលប្រព្រឹត្តទង្វើបែបនេះ ប៉ុន្តែក៏មានការបញ្ចេញយោបល់ជាច្រើនលើសលប់ផងដែរថា សកម្មភាពហិង្សារបស់ថៅស្ថានីយ៍ប្រេង និងកូនចៅ បានជ្រុលហើយ និងខុសច្បាប់ទៀតផង ដោយខ្លួនមិនមានសិទ្ធិទៅចាប់ចង ឬទៅប្រើហិង្សាទៅជនណាម្នាក់នោះឡើយ ត្រូវទុកឲ្យមន្ត្រីនគរបាលយុត្តិធម៌ចាត់ការតាមច្បាប់។ក្រោយមានការបកស្រាយព្រោងព្រាតយ៉ាងដូច្នេះ ស្រាប់តែនៅថ្ងៃទី១៨ ខែធ្នូ ឆ្នាំ២០១៩នេះ បុរសដែលរងការប្រើហិង្សានោះបានចេញមកបកស្រាយនៅលើ Facebook របស់ខ្លួនដោយបដិសេធ ទាំងស្រុងចំពោះការចោទប្រកាន់ទាំងនេះ និងបានអះអាងថា ខ្លួនមានក្របខ័ណ្ឌជាមន្ត្រីអប់រំ និងជាគ្រូបង្រៀនទៀតផង។លោក អ៊ឹម សិរីរដ្ឋ ដែលបានបង្ហោះអមដោយលិខិតបង្ហាញលទ្ធផលទៅពិនិត្យស្នាមរបួសនៅមន្ទីរអង្គឌួង និងមន្ទីរពេទ្យកាល់ម៉ែត រួមជាមួយអនុក្រឹត្យ និងព្រះរាជក្រឹត្យស្តីពី ការតែងតាំងតំណែង ខ្លួននោះ បានបដិសេធទាំងស្រុងថា លោកមិនបានប្រព្រឹត្តដូចការចោទប្រកាន់នោះទេ គឺជាការយល់ច្រឡំចូលទៅក្នុងបន្ទប់ទឹកនារី ពេលលោកបើករថយន្តទៅផ្ទះនៅឯខេត្តាកែវ ប៉ុន្តែមិនទាន់បានចេញមកស្រួលបួលផង ស្រាប់តែកូនចៅរបស់ថៅកែស្ថានីយ៍ប្រេង រត់មកចាប់វាយ និងបង្ខំឲ្យសារភាពទោសកំហុស។ លោកថា បើសមត្ថកិច្ចមកមិនទាន់ទេ នោះប្រហែលត្រូវថៅកែ និងកូនចាប់វាយលោករហូតស្លាប់ជាក់ជាមិនខានឡើយ។
តែយ៉ាងណាក៏ដោយ សម្រាប់ករណីនេះក៏មានចោទចំៗទៅលើថៅកែស្ថានីយ៍ប្រេង PTT លោក សារុន វិធុរៈ ថាខុសទាំងស្រុងដោយសារខ្លួន មិនមែនជាមន្ត្រីសមត្ថកិច្ច ហើយទៅចាប់ចង និងបញ្ជាឲ្យកូនចៅវាយយ៉ាងដូច្នេះទេ នោះវាក្លាយជាបទល្មើសព្រហ្មទណ្ឌហើយ ដែលតំណាងអយ្យការ តំណាងឲ្យរដ្ឋមានសិទ្ធិដាក់ពាក្យបណ្តឹងបាន បើទោះបីជនរងគ្រោះមិនបានដាក់ពាក្យប្តឹងក៏ដោយ។ មហាជននឹងរង់ចាំមើលចំណាត់ការនេះរបស់ព្រះរាជអាជ្ញា ទៅអ្នកដែលពាក់ព័ន្ធប្រើហិង្សាលើគ្រូបង្រៀន អ៊ឹម សិរីរដ្ឋ៕
