ខេត្តបន្ទាយមានជ័យ ៖ សង្ឃក្លែងក្លាយបីនាក់ មក ក្រុងប៉ោយប៉ែត ដើរបិណ្ឌបាត្រគ្រប់កន្លែង ចង្រៃអីចំ ថ្ងៃសិល៍ ហើយនិងលើសម៉ោង លើសវេលាឆាន់ថ្ងៃត្រង់ ធ្វើឲ្យ ពលរដ្ឋមានការ សង្ស័យ ប្តឹងសមត្ថកិច្ច និងព្រះអនុគុណ ចាប់បកស្បង់ចេញឲ្យស្លៀកពាក់គ្រហស្ដវិញ។ ករណីនេះ កើតឡើងកាលពីរសៀលថ្ងៃទី២៥ ខែធ្នូ ឆ្នាំ ២០១៩ នៅក្នុងវត្ត សិរីមង្គលស្ទឹងបត់ ក្នុងសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
លោកសង្ឃក្លែងក្លាយ៣អង្គនេះ មានឈ្មោះទី១-ឈ្មោះ គឹម ម៉ាត អាយុ ៣៣ឆ្នាំ ទី២-ឈ្មោះសឿន ចិត្រា អាយុ ២១ឆ្នាំ ទាំងពីរនាក់ រស់នៅភូមិ.ឃុំ.ស្រុកអង្គរជ័យ ខេត្តបាត់ដំបង និងទី៣-ឈ្មោះភី សារិទ្ធិ អាយុ២៧ឆ្នាំ រស់នៅក្នុងភូមិខ្វៀវ ឃុំបេង ស្រុកបន្ទាយស្រី ខេត្តសៀមរាប។ប្រភពព័ត៌មានពីពលរដ្ឋបានឲ្យដឹងថា មានលោកសង្ឃប្លែកមុខចំនួន៣អង្គ ដើរបិណ្ឌបាត និងចែកកម្មវិធីបុណ្យ និងបិណ្ឌបាត្រចំថ្ងៃសីល ផុតវេលាថ្ងៃត្រង់ ផុតម៉ោងឆាន់ ការស្លៀកពាក់ស្បង់គ្មានសណ្តាប់ធ្នាប់ ក្រោយមកពលរដ្ឋក៏សួរនាំ តែព្រះសង្ឃ១អង្គព្យាយាមមន្តគេចខ្លួនតែត្រូវឃាត់ខ្លួនបានផងដែរ ។ពលរដ្ឋបានបន្ថែមថា ជនសង្ស័យក្លែងបន្លំខ្លួនជាលោកសង្ឃនេះ ដើរបោកប្រាស់ពុទ្ធបរិស័ទថា យកបច្ច័យទៅកសាងសមទ្ធិផលនៅវត្តគិរីសែនសុខ (ហៅវត្តភ្នំ១៤៧) ស្ថិតនៅក្នុងស្រុកកំរៀង ខេតត្តបាត់ដំបង ដោយដើរអង្គាសលុយពុទ្ធបរិស័ទ នៅក្នុងក្រុងប៉ោយប៉ែត លើទីតាំងឃាត់ខ្លួននៅចំណុចផ្សារអគ្គៈថ្មីប៉ោយប៉ែត និងផ្សារត្រី សង្កាត់ប៉ោយប៉ែត ក្រុងប៉ោយប៉ែ។
ក្រោយពីឃាត់ខ្លួនសង្ឃទាំង៣អង្គនេះរួច ព្រះអនុគុណក្រុងប៉ោយប៉ែតធ្វើការទំនាក់ទំនងទៅកាន់ព្រះគ្រូអនុគុណស្រុកកំរៀង និងព្រះគ្រូចៅអធិការនៅវត្តគិរីសែនសុខ (ហៅវត្តភ្នំ១៤៧) បញ្ជាក់ថា មិនមែនជាលោកសង្ឃគង់នៅវត្តរបស់ខ្លួន ហើយខាងវត្តក៏មិនបានឲ្យលោកសង្ឃអង្គណាទៅធ្វើសកម្មភាពដើរអង្គាសលុយ ឬបិណ្ឌបាត្រនោះទេ សូមឲ្យចាត់ការទៅតាមច្បាប់ និងវិន័យពុទ្ធសាសនា។ ក្រោយពីបកស្បង់ចេញ ជនសង្ស័យទាំងបីនាក់ ត្រូវបានបញ្ជូនទៅឲ្យសមត្ថកិច្ចកងរាជអាវុធហត្ថមូលដ្ឋានក្រុងប៉ោយប៉ែតចាត់ការបន្តតាមនីតិវិធី៕
