Víctor Martín អាយុ 12 ឆ្នាំជាក្មេងប្រុសជនជាតិប៉េរូដែលស្ថិតនៅក្នុងគ្រួសារក្រីក្រ មិនមានលុយគ្រប់គ្រាន់ដើម្បីដំឡើងបរិក្ខាអគ្គិសនីទេ។ ដូច្នេះក្មេងប្រុសនេះបានមកពឹងផ្អែកលើពន្លឺអំពូលដងគោមនៅតាមផ្លូវដើម្បីធ្វើកិច្ចការសាលា។
រឿងរ៉ាវនេះត្រូវបានចេញផ្សាយដោយនាយកដ្ឋានប៉ូលីស Moche នៅក្នុងប្រទេសប៉េរូ នៅពេលដែលមន្ត្រីប៉ូលីសបានពិនិត្យមើលកាមេរ៉ាសុវត្ថិភាពស៊ីស៊ីធីវីដែលបំពាក់នៅតាមដងផ្លូវដោយបានកត់សម្គាល់ឃើញថា មានក្មេងប្រុសម្នាក់ អង្គុយនៅលើចិញ្ចើមផ្លូវធ្វើអ្វីម្យ៉ាង អំឡុងពេលយប់ ហើយនៅពេលដែល ប៉ូលីសបានពង្រីកកាមេរ៉ា ទើបបានដឹងថាក្មេងប្រុសនេះកំពុងអង្គុយធ្វើលំហាត់ដោយប្រើពន្លឺភ្លើងនៅតាមផ្លូវនេះ។នាយកដ្ឋានប៉ូលីសបានចែករំលែកវីដេអូនៅក្នុងបណ្តាញសង្គមហ្វេសប៊ុក ហើយវាបានក្លាយជាវីដេអូដែលល្បីយ៉ាងខ្លាំងមួយក្នុងរយៈពេលខ្លី ជាមួយនឹងអ្នកចូលទស្សនាជាង 5 លាននាក់ ។ ម្ដាយរបស់ក្មេងនេះ បាននិយាយ ថា Víctor ជាធម្មតាមិនបានបញ្ចប់កិច្ចការសាលារបស់គេដោយប្រើភ្លើងអគ្គីសនីក្នុងផ្ទះទេ។ ដើម្បីឱ្យភ្លឺងាយមើលអក្សរ ដូច្នេះគេបានសំរេចចិត្តចេញទៅក្រៅដោយប្រើពន្លឺភ្លើងបំភ្លឺផ្លូវដើម្បីបញ្ចប់ការធ្វើលំហាត់របស់គេ។លើសពីនេះទៀតម្តាយរបស់ក្មេងនេះបាននិយាយទៀតថា កូនប្រុសរបស់គាត់គឺជាក្មេងល្អម្នាក់ ហើយជារឿយៗជួយការងារផ្ទះ និងមើលថែចៀមរបស់គ្រួសារជារៀងរាល់ថ្ងៃ ប៉ុន្តែមិនដែលបោះបង់ការរៀនសូត្រ ហើយគាត់តែងតែទទួលបានចំណាត់ថ្នាក់ល្អ។
បន្ទាប់ពីរឿងនេះត្រូវបានបង្ហោះផ្សាយរហូតដល់ល្បីទូទាំងប្រទេស ចៅហ្វាយក្រុង បានធ្វើដំណើរទៅលេងដល់ផ្ទះរបស់ក្មេងប្រុស Víctor។ ហើយបានសន្យាថានឹងតំឡើងបរិក្ខារ និង ចេញថ្លៃចំណាយសម្រាប់អគ្គិសនីសម្រាប់គ្រួសាររបស់ Victor។នៅប្រទេសប៉េរូ, គ្រួសាររបស់ Victor គឺជាផ្នែកមួយនៃចំនួនប្រជាជនប្រហែល 5% នៅក្នុងទីក្រុង Moche ដែលគ្មានអគ្គិសនី ដោយសារតែគ្មានលទ្ធភាពក្នុងការបង់ថ្លៃអគ្គិសនី៕
