…ពិតជាចំណេះជិះកឯង ក្រោយពីទទួលបានជោគជ័យក្នុងការកែហ្សែនកូនភ្លោះលោកដុកទ័រយើងញញឹមខ្ចឹបសង្ឃឹមថាកេរ្តិ៍ឈ្មោះរបស់លោកពិតជាល្បីខ្ទរខ្ទាមិនខាននោះឡើយ។ ប៉ុន្តែម្ចាស់ថ្លៃអើយបានល្បីមែន តែពុំមែនបានល្បីឡើងទៅទទួលពានរង្វាន់នៅលើឆាកពីអ្នកធំនោះឡើយ…គឺល្បីឈ្មោះសឹងតែយកភួយគ្របមុខកុំឲ្យគេឃើញដ្បិតបានដើរទៅដេកក្នុងគុក។តុលាការចិនកាលពីថ្ងៃ ទី៣០ធ្នូបានផ្តន្ទាទោសវេជ្ជបណ្ឌិតម្នាក់ ដែលអះអាងថាជាអ្នកនៅពីក្រោយទារកកែហ្សែនដំបូងគេបង្អស់នៅលើពិភពលោក ឱ្យជាប់ពន្ធនាគាររយៈពេល ៣ ឆ្នាំពីបទអនុវត្តការព្យាបាលដោយខុសច្បាប់។
ទីភ្នាក់ងារសារព័ត៌មានស៊ីនហួបាននិយាយថាលោកហឺ ជានគុយ ដែលធ្វើឱ្យសហគមន៍វិទ្យាសាស្ត្រមានការភ្ញាក់ផ្អើលកាលពីឆ្នាំមុនដោយប្រកាសពីកំណើតកូនភ្លោះកែហ្សែនដើម្បីស៊ាំនឹងមេរោគហ៊ីវ ក៏ត្រូវបានពិន័យជាប្រាក់ចំនួន ៣ លានយ័នដែរ គឺប្រមាណ៤៣០.០០០ ដុល្លារ ។
ទីភ្នាក់ងារសារព័ត៌មានចិនស៊ីនហួបាននិយាយថា ដុកទ័រហឺជានគុយត្រូវបានកាត់ទោសដោយតុលាការនៅទីក្រុងស៊ិនចិនពីបទ “អនុវត្តការកែហ្សែនអំប្រ៊ីយ៉ុងរបស់មនុស្សដោយខុសច្បាប់សម្រាប់ការបន្តពូជ”។អ្នកស្រាវជ្រាវពីរនាក់ទៀតរបស់ដុកទ័រហឺក៏ត្រូវបានកាត់ទោសផងដែរ។ លោកចាង រេនលីត្រូវបានកាត់ទោសឱ្យជាប់ពន្ធនាគាររយៈពេល ២ ឆ្នាំនិងពិន័យជាប្រាក់មួយលានយ័ន ខណៈលោកឈីន ជីនចូវត្រូវបានផ្តន្ទាទោសជាប់ពន្ធនាគារ ១៨ ខែ ព្យួររយៈពេល ២ ឆ្នាំ និង ពិន័យជាប្រាក់ ៥០០.០០០ យ័ន។សាលក្រមបានប្រកាសថា អ្នកទាំងបីមិនមានលក្ខណៈសម្បត្តិគ្រប់គ្រាន់ក្នុងការបំពេញការងារជាវេជ្ជបណ្ឌិតទេហើយបានរំលោភបទបញ្ជានិងគោលការណ៍សីលធម៌របស់ប្រទេសចិនដោយចេតនា។
សាលក្រមបន្តថា ពួកគេទាំងបីបានធ្វើសកម្មភាពដើម្បីស្វែងរកកិត្តិនាមផ្ទាល់ខ្លួននិងទទួលបានផលផ្ទាល់ខ្លួន និងរំខានយ៉ាងធ្ងន់ធ្ងរដល់សណ្តាប់ធ្នាប់វេជ្ជសាស្ត្រ។ស៊ីនហួបាននិយាយថា ទារកកែហ្សែនទី ៣ បានកើតមកដោយសារតែការពិសោធន៍របស់គាត់ ដែលការកើតនេះមិនត្រូវបានបញ្ជាក់ពីមុនទេ៕
លោកហឺ ជានគុយ ជាប់៣ឆ្នាំពីបទអនុវត្តវេជ្ជសាស្ត្រខុសច្បាប់
