…សត្វស្វាចិញ្ចឹមពេលខ្លះវាធ្វើស្រាប់តាមមនុស្ស ឃើញហើយគួរឲ្យផ្ទុះសំណើចពន់ពេកណាស។ដូចជា សត្វស្វាពូជឈីមផេនហ្ស៊ីនៅសួនសត្វមួយក្បាល បានធ្វើឱ្យអ្នកមើលថែវាមានការភ្ញាក់ផ្អើលជាខ្លាំង ពេលប្រទះឃើញវាកំពុងបោកអាវរបស់គាត់។ ស្វាឈ្មោលដ៏ឆ្លាតមួយក្បាលនេះគេដាក់ឈ្មោះឲ្យថា Yuhui ហើយអ្នកមើលថែសួនសត្វនៅទីនោះថតជាប់ក្នុងវីដេអូមួយ ស្របពេលវាកំពុងបោកអាវដោយចេះប្រើទាំងច្រាស និងសាប៊ូទៀតផង។
គេប្រទះឃើញសកម្មភាពរបស់វាកាលពីថ្ងៃសុក្រសប្តាហ៍មុន នៅឯសួន Lehe Ledu Theme មានទីតាំងស្ថិតនៅក្នុងទីក្រុង Chongqing ភាគនិរតីនៃប្រទេសចិន។ អ្នកនាង ហ្ស៊ូ ដែលជាអ្នកមើលថែស្វានេះបានប្រាប់សារព័ត៌មាន ECNS ថា ស្វាឈ្មោះYuhui បានឃ្លាំមើលនៅពេលនាងយកសម្លៀកបំពាក់ទៅបោកនៅទីនោះ ដូច្នេះអ្នកនាង ហ្ស៊ូ បានសម្រេចចិត្តទុកអាវយឺត និងសាប៊ូរួមទាំងច្រាស់នៅទីនោះ ដើម្បីរង់ចាំមើលថាតើវាចង់ធ្វើអ្វី។ នាងបាននិយាយថា “ខ្ញុំមិនដែលមានបំណងបង្រៀនវាទេ តែវាសង្កេតមើលសកម្មភាពខ្ញុំមិនឈប់សោះ ដូច្នេះខ្ញុំឆ្ងល់ថាតើវានឹងធ្វើដោយខ្លួនឯងឬអត់” ។ ខ្សែវីដេអូដែលត្រូវបានចែកចាយតាមអ៊ិនធឺណេត បានបង្ហាញយ៉ាងច្បាស់ពីសកម្មភាពរបស់វាដោយបានដាក់សាប៊ូនិងប្រើច្រាសដើម្បីបោកអាវយឺតនោះ។
នាងហ្ស៊ូបានប្រាប់សារព័ត៌មាន Daily Mail ថា Yuhui ជាស្វាមួយក្បាលដែល ចង់ដឹងចង់ឃើញហើយពូកែណាស់ខាងធ្វើត្រាប់តាមសកម្មភាពមនុស្ស៕
