កន្លងមក ពុទ្ធបរិស័ទជាង១ពាន់នាក់ ក៏បានផ្ទុះការតវ៉ាយ៉ាងខ្លាំង ទាមទារអោយបណ្តេញភិក្ខុ សេង ថង ចេញពីចៅអធិការវត្តគោកបញ្ជាន់ នេះផងដែរ ប៉ុន្តែចៅអធិការវត្តគោកបញ្ជាន់ បដិសេធជុំវិញការចោទប្រកាន់ថាលក់ដីវត្តនេះ ។ជុំវិញរឿងរ៉ាវចោទប្រកាន់នេះបានអូសបន្លាយយូក្រែលមកហើយ ប្រៀបដូចជាភ្លៀងរលឹមស្រិចៗ។ ប៉ុន្តែពេលនេះដំណោះស្រាយឈ្នះ ឈ្នះត្រូវប្រកាន់យកគឺលោកចៅអធិការវត្តចេញទៅគង់នៅវត្តផ្សេងគឺអត់មានអ្នកចាញ់ទេ…ឈ្នះទាំងអស់គ្នា។
គណៈសង្ឃនាយក នៃព្រះរាជាណាចក្រកម្ពុជា បានចេញសេចក្តីសម្រេច បញ្ចប់មុខតំណែងភិក្ខុ សេង ថង ពីចៅអធិការវត្តគោត្តរង្សី ហៅ«វត្តគោកបញ្ជាន់» និងធម្មធរអនុគណ ខណ្ឌពោធិ៍សែនជ័យ រាជធានីភ្នំពេញ ។ សេចក្តីសម្រេចទើបត្រូវបានផ្សព្វផ្សាយជាសាធារណៈ នៅថ្ងៃទី២ ខែមករា ឆ្នាំ២០២០ ។បើយោងតាមសេចក្តីសម្រេចរបស់គណៈសង្ឃនាយកនៃព្រះរាជាណាចក្រកម្ពុជា ចុះថ្ងៃទី៤ ខែធ្នូ ឆ្នាំ២០១៩ អោយដឹងថា ភិក្ខុ សេង ថង ត្រូវនិមន្តចេញពីវត្តគោត្តមរង្សី ហៅវត្តគោកបញ្ជាន់ ហើយទៅគង់នៅវត្តជម្ពូវ័ន ។ ចំពោះអាចារ្យ គណៈកម្មការវត្ត នៅវត្តគោកបញ្ជាន់ ត្រូវរៀបចំសមាសភាពថ្មីឡើងវិញ បន្ទាប់ពីការតែងតាំង ព្រះចៅអធិការថ្មី ។មន្ត្រីសង្ឃសាលាគណ និងអនុគណ ខណ្ឌពោធិ៍សែនជ័យ រួមនិងអាជ្ញាធរមានសមត្ថកិច្ច ត្រូវចុះបញ្ជីសារពើភណ្ឌរបស់វត្តគោត្តរង្សី ហៅវត្តគោកបញ្ជាន់ អោយបានមុនថ្ងៃ ដែលភិក្ខុ សេង ថង និមន្តចេញពីវត្ត ។
អាជ្ញាធរមានសមត្ថកិច្ចដោះស្រាយរឿងបុគ្គលដទៃទៀត ដែលពាក់ព័ន្ធនឹងការលក់ដីវត្តគោត្តរង្សី ហៅ វត្តគោកបញ្ជាន់ តាមនីតិវិធីច្បាប់ជាធរមាន ក្នុងគោលបំណងថែរក្សាអោយបាននូវដីវត្តដែលជាសម្បត្តិគរុភណ្ឌសង្ឃ ៕