…តារាចម្រៀងប្រុសស្រីដែលមានឈ្មោះបោះសំឡេងប្រាក់ហូរចូលខ្ជោកៗក្លាយជាអ្នកមានក៏អាស្រ័យទៅដោយទឹកដមសំឡេងដ៏ពិរោះយ៉ាងក្រអួនក្រអៅនោះដែរ។ យ៉ាងណាមិញ ចំពោះសម្លេងដ៏ក្រអួនក្រអៅនេះ មិនសម្រាប់តែច្រៀងទើបអាចរកប្រាក់បាននោះទេ…សូម្បីតែស្រែកយំចេះលើកដាក់សម្លេងខ្ពស់-ទាបក៏មានឈ្មោះល្បីមានគេតាមហៅរកប្រាក់រត់ចូលផ្ទះដូចតែគ្នាហ្នឹង!។ ជាក់ស្តែងដូចស្ត្រីជនជាតិចិនវ័យកណ្តាលម្នាក់នេះអញ្ចឹង ក្រោយពីបានប្រកបមុខរបរដើរស្រែកយំតាមរោងបុណ្យសព បានធ្វើឱ្យស្ត្រីរូបនេះក្លាយជាអ្នកមានយ៉ាងងាយ ។
ស្ត្រីរូបនេះ រស់នៅក្នុងខេត្តហឺណាន នៃប្រទេសចិន ។ បើតាមឱ្យដឹង ស្ត្រីជនជាតិចិត្តរូបនេះ មានសមត្ថភាព និង ជំនាញពិសេសគឺការ «យំ» ដោយគាត់តែងបានប្រើជំនាញនេះដើម្បីរកស៊ី និង ទទួលបានប្រាក់ផ្គត់ផ្គង់គ្រួសារ ហើយគាត់តែងតែត្រូវបានគេជួលឱ្យទៅធ្វើជាអ្នកកាន់ទុក្ខតាមរោងបុណ្យសពជាហូរហែ ។ជាមួយនឹងមុខរបរនេះដែរ ស្ត្រីជនជាតិចិនដដែលនេះរកចំណូលបានមិនស្ទើរឡើយ ដោយសម្រាប់ការកាន់ទុក្ខម្តងរយៈពេល ៣០ នាទី គាត់អាចរកលុយបានប្រមាណ ៣០០ យ័ន ស្មើនឹង ៤២ ដុល្លារ ហើយសរុបក្នុងមួយឆ្នាំ គាត់រកចំណូលបានប្រមាណ ២០០ ០០០ យ័ន ស្មើ ២៨០០០ ដុល្លារអាមេរិក ។
គួរឱ្យដឹងដែរថា សម្រាប់មុខរបរស្រែកយំទួញសោកសិប្បនិមិត្តនេះ ស្ត្រីជនជាតិចិនរូបនេះបានប្រកបអស់រយៈពេល ២០ ជាងមកហើយ ហើយចំណូលដែលរកបាននោះ គាត់បានទិញផ្ទះសម្រាប់គ្រួសាររស់នៅយ៉ាងស្រួល មានចំនីអាហារហូបចុកគ្រប់គ្រាន់ និង បានបញ្ជូនកូនប្រុសច្បងរបស់គាត់ទៅរៀននៅសាកលវិទ្យាល័យថែមទៀតផង ៕
