…នៅស្រុកគេរឿងរ៉ាវសម្ញែងទ្រព្យសម្បត្តិបានកើតឡើងជាហូរហែរួចមកហើយ ដូចជាសេដ្ឋីខ្លះគ្រាន់តែកើតក្តីមួម៉ៅតិចតួចសោះក៏ទិញរថយន្តអាស៊េរីទំនើបតម្លៃខ្ពស់ជាងគេមកវៃកម្ទេចចោលលេង។ ដូច្នេះហើយបើឃើញអ្នកមានវ៉ៃកម្ទេចរបស់ទ្រព្យអ្វីមួយ…ពុំចាំបាច់ភ្ញាក់នោះទេ។ តួយ៉ាងលោកឧត្តមសេនីយមួយរូបនៅក្នុងស្រុកខ្មែរយើងនេះបានទិញអាគារពុំទាន់សាងសង់រួចកំពស់៧ជាន់វ៉ៃចោល!។
សំណង់អគារកម្ពស់៧ជាន់ ដែលទើបនឹងសាងសង់បានប្រហែល៧០ភាគរយទៅហើយ ក៏ត្រូវបានឧត្តមសេនីយ៍ម្នាក់ ទិញវាយកម្ទេចចោលទាំងស្រុង ហើយក៏មានការភ្ញាក់ផ្អើល និងងឿងឆ្ងល់យ៉ាងខ្លាំង ដោយសារតែគេពុំដឹងពីមូលអ្វីពិតប្រាកដនោះទេ។សំណង់ ដែលសង់មិនទាន់រួចរាល់ហើយវាយកម្ទេចចោលវិញនេះ មានទំហំប្រមាណជិត២០ម៉ែត្រគុណនឹងជិត៣០ម៉ែត្រ មានកម្ពស់ប្រមាណ៧ជាន់ ស្ថិតនៅតំបន់អភិវឌ្ឍន៍ ឫស្សីកែវ ក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ។តាមកម្មករ ដែលជាក្រុមវាយកម្ទេចបានរៀបរាប់ឲ្យដឹងថា ពួកគាត់ត្រូវបានគេជួលឲ្យវាយអគារនេះអស់រយៈពេលប្រមាណ១ខែមកហើយ។ កម្មករ រូបនោះបានបញ្ជាក់ថា ការវាយចោលសំណង់នេះដើម្បីពង្រីកដីរបស់លោក ឧត្ដមសេនីយ៍យោធាម្នាក់ ។
តាមព័ត៌មានឲ្យដឹងថា សំណង់នេះសាងសង់ប្រមាណជាង១ឆ្នាំ មកហើយ ដែលការសាងសង់បានជាគ្រោងរៀបឥដ្ឋបាន២ជាន់ក្រោមខាងលើមិនទាន់រៀបឥដ្ឋឡើយ។ លុះក្រោយមកនៅពេលថ្មីៗនេះ លោកឧត្ដមសេនីយ៍បានទិញយកដើម្បីពង្រីកភូមិគ្រឹះរបស់ខ្លួន ហើយក៏បានវាយកម្ទេចចោលតែម្តង ។ លោក ស៊ូ សោគន្ធ អភិបាលរងខណ្ឌឫស្សីកែវបានប្រាប់អ្នកសារព័ត៌មានថា លោកពុំបានដឹងអំពីរឿងនេះទេ ព្រោះការទិញលក់គេស៊ីញេដល់ខណ្ឌមែន តែការវាយកម្ទេចចោលគេមិនបានសុំច្បាប់ទេ៕
