…តាមពិតទៅសាកសពប្រៀបបានជាវត្ថុដែលឥតវិញ្ញាណទៅហើយ ពុំមានសល់នូវក្តីគុំកួនដែលបុគ្គលនៅមានជីវិតមកធ្វើការសងសឹកនោះទេ។ ពីព្រោះការសម្តែងចេញនូវទង្វើសងសឹកមកលើរាំរូបកាយសាកសពវាជាទង្វើមួយដ៏អសីលធម៌បំផុត។ ប៉ុន្តែដោយសារចេះតែកើតមាននូវទង្វើដ៏មិនសមរម្យមកលើសាកសពទើបនៅស្រុកចិនក៏មានច្បាប់មួយការពារសាកសពគឺបុគ្គលណា វ៉ៃដំសាក់សពត្រូវជាប់គុកមិនតិចឆ្នាំនោះឡើយ។ការគុំគួនរវាងគ្រួសារមួយនៅក្នុងប្រទេសចិនបានប្រែក្លាយពិធីបុណ្យសពរបស់បុរសចំណាស់ម្នាក់ទៅជាការវាយតប់ដ៏អាក្រក់អាក្រីរវាងបងប្អូនបង្កើតតូចចិត្តមួយក្រុម ជាមួយនឹងសាកសពឪពុករបស់ពួកគេ។ បងប្អូនបង្កើតទាំងបីនៅ Jiangsu មានការខឹងសម្បារយ៉ាងខ្លាំងចំពោះឪពុកស្លាប់ទៅ រហូតដល់ថ្នាក់ពួកគេអូសខ្មោចគាត់ចេញពីក្តារមឈូសរួចវាយសាកសពយ៉ាងចាស់ដៃ ដោយបង្កឱ្យមានឈុតឆាកហិង្សាដ៏ចម្លែកនៅពិធីបុណ្យសព ។
នេះបើយោងតាមប្រព័ន្ធផ្សព្វផ្សាយចិនចុះផ្សាយកាលពីថ្ងៃទី២មករា២០២០។វីដេអូនៃព្រឹត្តិការណ៍ដ៏តក់ស្លុតនេះបានបង្ហាញបុរសស្ត្រីមួយក្រុមមានគ្នា៧នាក់ចូលមកជុំវិញក្តារមឈូសនិងបើកគម្របក្តារមឈូសគ្រវាត់ចោល។ បុរសម្នាក់បានចូលមកទះកំផ្លៀងសាកសពនិងស្រែកជេរសាកសព មុនពេលបុរសម្នាក់ទៀតចូលមកទាញខ្មោចចេញពីក្តារមឈូសទម្លាក់ចោលមកលើដី។ កូនម្នាក់ក្នុងចំណោមនោះបានស្រែកថា "ឪឯងធ្វើបាបខ្ញុំកាលឪឯងនៅរស់។ ចឹងសូម្បីឪឯងស្លាប់ទៅ ក៏ខ្ញុំនឹងមិនឱ្យឪឯងស្លាប់ស្រួលៗនោះដែរ"។ សាកសព ដែលគេមិនបញ្ចេញឈ្មោះ តាមដឹងគឺបានបោះបង់ប្រពន្ធនិងកូន៣នាក់កាលពី៤០ឆ្នាំមុន ក្រោយពីលួចផិតជាមួយស្រីម្នាក់ក្នុងភូមិជាមួយគ្នា។ក្រោយឪពុកអាយុ៧២ឆ្នាំរូបនេះស្លាប់ដោយសារជំងឺថ្មីៗនេះ ស្ត្រីជាម្តាយប្រាប់កូនទាំងបីឱ្យទៅអុជធូបថ្វាយបង្គំសពឪពុកខ្លួន តែពួកគេបែរជាបង្ករឿងនៅពិធីបុណ្យសពផ្អើលមនុស្សចូលរួមអន្តរាគមន៍ជាង២០នាក់។ ទោះយ៉ាងណា កូនប្រុសធម៌ម្នាក់បានជំទាស់នឹងការលើកឡើងរបស់កូនប្រុសទាំងបីនោះនៅក្នុងកិច្ចសម្ភាសន៍ជាមួយកាសែត Beijing Youth Daily ដោយអះអាងថា រូបគេជាអ្នកចេញថ្លៃធ្វើបុណ្យសពឪពុកធម៌ទាំងអស់តែម្នាក់ឯង។កូននោះនិយាយថា សពឪពុកធម៌របស់ខ្លួនបានចាកចេញពីគ្រួសារក្រោយឈ្លោះគ្នាជាមួយប្រពន្ធគាត់ មិនមែនដោយសារផិតជាមួយស្រីផ្សេងទេ។
កូនធម៌នោះនិយាយថា បងប្អូនបង្កើតទាំងបីនោះព្យាយាមជំរិតទារប្រាក់ពីគាត់ ព្រោះយល់ថាគាត់ជាអ្នកមាន ហើយក៏បង្កើតឈុតឆាកវាយខ្មោចនេះឡើង ព្រោះកូនធម៌នេះជំទាស់កូនទាំងបីមិនឱ្យចូលរួមបុណ្យសព។ ប៉ូលិសបញ្ជាក់ថា ពួកគេកំពុងស៊ើបអង្កេតឧបទ្ទវហេតុនេះហើយ។ ជនណាដែលត្រូវបានផ្តន្ទាទោសពីបទប្រមាថសាកសពក្នុងប្រទេសចិន ប្រឈមជាប់គុក៣ឆ្នាំ និងធ្វើការងារសហគមន៍ថែមទៀតផង៕