…សរសេរពាក្យបណ្តឹងហើយយកទៅដាក់នៅតុលាការប្រាកដជាអស់លោកតុលាការសើចគិល ហើយគ្រវីក្បាលទុកជាមោឃៈអត់លើកយកមកកាត់ក្តីនោះទេ ពីព្រោះឲ្យកាត់ក្តីយ៉ាងម៉េចបើស្រោមអនាម័យគេផលិតសុទ្ធតែគុណភាព តែបែជាមកប្តឹងថា ស្រោមអនាម័យអន់ ស្លៀកពីរជាន់ទៅហើយម្តេចឡើយប្រពន្ធនៅតែមានកូនទៀត។ រឿងរ៉ាវគួរឲ្យផ្ទុះសំណើចនេះគឺ បុរសម្នាក់គ្រោងប្ដឹងក្រុមហ៊ុនផលិតស្រោមអនាម័យមួយគឺក្រុមហ៊ុន Durex ព្រោះតែគាត់ខឹងយ៉ាងខ្លាំងថា គាត់បានប្រើស្រោមអនាម័យម៉ាកនេះរហូតដល់ទៅ ២ ជាន់ហើយ តែប្រពន្ធរបស់គាត់នៅមានផ្ទៃពោះទៀត។ បុរសដែលគ្រោងនឹងដាក់ពាក្យបណ្ដឹងក្នុងករណីចម្លែកនេះមានឈ្មោះ Wang និងកំពុងរស់នៅក្នុងប្រទេសចិន។
លោក Wang បានប្រាប់ឲ្យដឹងថា គាត់មានកូនពីរនាក់រួចហើយទើបគាត់មិនចង់មានកូនទៀតទេ ដូចនេះហើយគាត់ក៏បានជ្រើសរើសការប្រើប្រាស់ស្រោមអនាម័យ Durex ដើម្បីធ្វើជាមធ្យោបាយពន្យាកំណើត។ គាត់បានបន្តទៀតថា យប់មួយគាត់បានប្រើប្រាស់ស្រោមអនាម័យដល់ទៅ ២ ជាន់ ពេលរួមភេទជាមួយប្រពន្ធ តែក្រោយពេលរួមភេទរួចគាត់បានប្រទះឃើញចុងស្រោមអនាម័យដែលគាត់ប្រើទាំងពីនោះសុទ្ធតែមានស្នាមធ្លុះ។លុះព្រឹកឡើងគាត់បានទៅទិញថ្នាំពន្យាកំណើតឲ្យប្រពន្ធគាត់លេបថែមទៀតផង តែពេលនេះប្រពន្ធរបស់គាត់នៅតែមានផ្ទៃពោះដដែល ទើបបានជាគាត់ខឹងយ៉ាងខ្លាំង និងគ្រោងដាក់ពាក្យបណ្ដឹងទៅកាន់តុលាការ ។
ឆ្លើយតបនឹងបញ្ហានេះដំណាងក្រុមហ៊ុន Durex បានឲ្យដឹងថា ក្រុមហ៊ុនស្វាគមន៍ចំពោះការដោះស្រាយតាមផ្លូវច្បាប់ តែយ៉ាងណាក្តី លោក Wang ត្រូវតែបង្ហាញថា គាត់ពិតជាចេះពីរបៀបប្រើប្រាស់ស្រោមអនាម័យត្រឹមត្រូវតាមក្បួនខ្នាតជាមុនសិន។ ចំពោះក្រុមអ្នកប្រើប្រាស់បណ្តាញសង្គមវិញបានបន្ថែមក្នុងន័យឌឺដងថា បើប្រើស្រោមអនាម័យត្រឹមត្រូវហើយតែប្រពន្ធនៅមានកូនទៀត មានន័យថាប្រពន្ធគាត់មានដៃគូរួមភេទផ្សេងទៀតហើយ៕
