…កាលពីប៉ុន្មានខែមុននេះលោកផេនបានទៅលេងផ្ទះឪពុក-ម្តាយនៅឯជនបទ។នៅទីនោះលោកផេន មានអារម្មណ៍សប្បាយរីករាយណាស់...លោកបានទៅហែលទឹកលេងក្នុងបឹងហើយវិលត្រឡប់មកទីក្រុងវិញ។ លុះក្រោយមកលោក ផេន ហួសចិត្តយ៉ាងខ្លាំងដោយសារតែសត្វមួយក្បាលបានតាមលោកពីបឹងនៅឯជនបទមកដល់ទីក្រុង។ប្រភពព័ត៌មានOddity Central បានឲ្យដឹងថាបុរសជនជាតិចិនម្នាក់មានសត្វឈ្លើងមួយក្បាលប្រវែងជាង២សង់ទីម៉ែត្ររស់នៅក្នុងរន្ធច្រមុះអស់រយៈពេលយ៉ាងហោចណាស់៣ខែដែលធ្វើរូបគេចេះតែហូរឈាមច្រមុះមិនបាត់។
លោកផេនបានទៅមន្ទីរពេទ្យ Dongguan Chang’an នៅក្នុងខេត្ត Guangdong ប្រទេសចិនក្រោយពីកើតអការៈហូរឈាមច្រមុះជាប់រហូតអស់រយៈពេល១០ថ្ងៃ។ លោកវេជ្ជបណ្ឌិតខាងត្រចៀក-ច្រមុះ-បំពង់កLiu Yuxing ភ្លាមៗនោះសង្ស័យថាមានសត្វឈ្លើងទាមនៅក្នុងរន្ធច្រមុះ។ រូបលោកមិនដែលជួបអ្នកជំងឺណាបែបនេះឡើយ។ លោកធ្លាប់តែជួបតាមរយៈការអានសៀវភៅប៉ុណ្ណោះ។ ដល់ពេលពិនិត្យមើលអង់ដូស្កុបទើបលោកដឹងថាការសង្ស័យពិតជាត្រឹមត្រូវមែន។លោកវេជ្ជបណ្ឌិតឯកទេសបានមានប្រសាសន៍ថា៖ «បើទោះបីជាខ្ញុំមិនដែលជួបស្ថានភាពជំងឺបែបនេះតាំងពីខ្ញុំចេញធ្វើពេទ្យក្តីក៏ខ្ញុំអាចទាញការសង្ស័យថាអ្នកជំងឺមានសត្វឈ្លើងនៅក្នុងរន្ធច្រមុះដូចទៅនឹងអ្វីដែលខ្ញុំបានអានក្នុងសៀវភៅ។ ដោយសារតែវាទាមជាប់នឹងសាច់រន្ធច្រមុះពេកការទាញយកវាចេញមិនមែនជាការងាយស្រួលនោះទេ»។ខណៈពេលកំពុងធ្វើការទាញយកសត្វឈ្លើងចេញពីរន្ធច្រមុះលោកវេជ្ជបណ្ឌិតLiuនិងមិត្តរួមការងារបានប្រើប្រាស់ថ្នាំស្ពឹកដាក់ទៅលើសត្វឈ្លើងដើម្បីឲ្យវាស្ពឹកបឺតមិនសូវជាប់រួចហើយទើបទាញយកវាចេញយឺតៗ។ ដូចជាយើងបានឃើញនៅក្នុងវីដេអូ សត្វស៊ីឈាមមួយក្បាលនោះមិនតូចទេ។ សំនួរសួរថាហេតុអ្វីបានជាវាអាចចូលក្នុងរន្ធច្រមុះបាន?
តាមការរៀបរាបរបស់លោកផេនដែលជាអ្នកឈឺបានឲ្យដឹងថាកាលពីបីខែមុនលោកបានទៅហែលទឹកបឹង។ វេជ្ជបណ្ឌិតទាញសេចក្តីសន្និដ្ឋានបានថានេះមកពីពងរបស់សត្វឈ្លើងចូលក្នុងរន្ធច្រមុះហើយញាស់រហូតបានធំដល់ថ្ងៃធ្វើទុក្ខ៕
