...រឿងរ៉ាវដែលក្រុមអ្នកវិទ្យាសាស្ត្របង្ហាញពីការរកឃើញរបស់ខ្លួនពីនេះ...ពីនោះនៅឯឋានព្រះច័ន្ទរហូតចេញការអៈអាងថា...នៅពេលខាងមុខមនុស្សក៏អាចទៅរស់នៅឋានព្រះច័ន្ទបានដែរបានលេចឮឡើងយូរមកហើយ។កាលពីពេលកន្លងទៅនេះក្រុមហ៊ុនផលិតរថយន្ត Lexus ក៏ដូចជា Toyota បានរួមគ្នា រចនាឡើងនូវ Concept គួរឲ្យចាប់អារម្មណ៍មួយចំនួន ស្តីពីយានជំនិះនៅលើឋានព្រះច័ន្ទ។ នេះបើតាមការដកស្រង់ការផ្សាយ ចេញពីវែបសាយព័ត៌មាន Edgadget នា ថ្ងៃចន្ទ ទី២០ ខែមករា ឆ្នាំ២០២០។
Concept យានជំនិះសរុបចំនួន ០៧ ត្រូវបានបង្កើតឡើងដោយស្ទូឌីយ៉ោ ផ្នែកខាងរចនាម៉ូដរបស់ក្រុមហ៊ុនផលិតរថយន្តទាំងពីរ សាខាប្រចាំនៅអឺរ៉ុប ។ ក្នុងចំណោម Concept ទាំង ០៧ គំរូរចនាដែលលេចធ្លោជាងគេមួយហៅថា Zero Gravity ត្រូវបាន ជ្រើសរើសយកទៅចុះផ្សាយក្នុងទស្សនាវដ្តីDocument Journal។ Concept «Zero Gravity» នេះ គឺជាយានជំនិះមានរូបរាងដូចជាម៉ូតូយន្ត ក៏ប៉ុន្តែមិនមានកង់នោះទេ ដែលអ្នករចនាវាឡើងទំនងចង់ប្រើទ្រឹស្តីបច្ចេកវិទ្យាហៅថា Magnetic levitation គឺបណ្តែតខ្លួនដោយប្រើកម្លាំងម៉ាញេទិច។គួរជម្រាបថា គំរូរចនាដទៃៗទៀត ក៏សុទ្ធតែគួរឲ្យចាប់អារម្មណ៍ដូចគ្នា រួមមានដូច Lexus Comos ដែលទំនងជាយានសម្រាកសំកាំងខ្លួនលើផ្ទៃអាកាសព្រមទាំង Bouncing Moon Roller, Lexus Lunar Cruiser និង Lexus Moon Racer ដែលទំនងជាយានសម្រាប់បើកបរផ្ទាល់លើផ្ទៃដី និង Lexus Lunar Mission ដែលជាយានអវកាសសម្រាប់ដឹកមនុស្សពីផែនដីទៅកាន់ព្រះច័ន្ទ។
ដោយឡែកអ្វីដែលប្រាកដពេលនេះ ពួកវាគ្រាន់តែជាការស្រមើស្រម៉ៃ របស់អ្នករចនាម៉ូដយានជំនិះ របស់ក្រុមហ៊ុនផលិតរថយន្ត Lexus និង Toyota ប៉ុណ្ណោះ ដោយយានជំនិះពិតប្រាកដដែល ត្រូវប្រើនៅឋានព្រះច័ន្ទនាពេលអនាគត ច្បាស់ជានឹងមានរូបរាងធម្មតាៗជាងអ្វីទាំងអស់នេះ៕
