…ស្ថិតក្នុងដំណាក់កាលជម្ងឺមហារីកចុងក្រោយស្ត្រីម្នាក់នេះកើតមានអារម្មណ៍ខ្វល់ខ្វាយយ៉ាងខ្លាំង…នាងគឹកទៅដល់កូនស្រីវ័យ៩ឆ្នាំរបស់នាង ថាតើពេលដែលអត់ពីរូបនាងទៅ តើកូនស្រីរស់នៅដោយរបៀបយ៉ាងណា?គិតសព្វចុះឡើង…ផ្លូវចិត្តរបស់នាងកាន់តែបាត់ស្រុតចុះរហូតនឹកឃើញនូវគំនិតមួយយ៉ាងសាហាវ…។ម្តាយម្នាក់ នេះ បានច្របាច់កសម្លាប់កូនស្រីអាយុ៩ឆ្នាំ បន្ទាប់មកលោតតាមបង្អួចផ្ទះ៨ជាន់សម្លាប់ខ្លួនតាមក្រោយនៅតែទៅពុំទាន់កូននោះឡើយគឺកូនស្លាប់ឯម្តាយចូលពេទ្យ។
រឿងរ៉ាវនេះកើតឡើងប្រទេសរុស្ស៊ី ដែលចេញផ្សាយដោយកាសែត Daily Mial កាលពីថ្ងៃទី២១មករា។អ្នកស្រី Maria Russkikh អាយុ ២៩ ឆ្នាំ បានរួចផុតពីសេចក្តីស្លាប់នៅទីក្រុង Novosibirsk ស្ថិតនៅតំបន់ស៊ីបេរីភាគនិរតី និងសព្វថ្ងៃកំពុងសម្រាកព្យាបាលនៅមន្ទីរពេទ្យ។ អ្នកស្រីត្រូវអ្នកស្រុកក្បែរខាងប្រទះឃើញដេកស្តូកស្តឹងនៅលើព្រិល និងស្រែកថ្ងូរទាំងឈឺចាប់ មុនពេលអ្នកស្រុកតេហៅរថយន្តសង្គ្រោះ។ អ្នកជិតខាងម្នាក់និយាយប្រាប់បណ្តាញផ្សព្វផ្សាយថា "ស្ត្រីនេះស្ទើរតែស្រាតននលគក។ ដៃនិងជើងរបស់នាងប្រឡាក់ឈាមជោគ ប៉ុន្តែដងខ្លួនពុំមានឈាមទេ។ ខ្ញុំសួរនាងថាមានរឿងអីកើតឡើង ប៉ុន្តែនាងមិនឆ្លើយទេ។ នាងគ្រាន់តែនិយាយថា ជួយខ្ញុំផង ខ្ញុំស្ពឹកដៃជើងអស់ហើយ"។ខណៈអ្នកសង្គ្រោះសែងនាងដាក់ក្នុងរថយន្ត ប៉ូលិសបានចូលផ្ទះរបស់នាងរកឃើញកូនស្រីអាយុ៩ឆ្នាំរបស់នាងដេកស្លាប់ក្នុងថ្លុកឈាម។ការពិនិត្យកោសល្យវិច័យបង្ហាញថា ក្មេងនោះត្រូវបានវាយនឹងរបស់ធ្ងន់មួយចំក្បាល មុនពេលត្រូវច្របាច់កស្លាប់។ អ្នកស៊ើបអង្កេតនិយាយថា ឈាមដែលប្រឡាក់ដៃជើងរបស់អ្នកស្រី Russkikh តាមពិតជាឈាមកូនស្រីរបស់គាត់។
ក្រៅពីនេះប៉ូលិសបានរកឃើញសំបុត្រមួយច្បាប់ដែលស្ត្រីជាម្តាយរូបនេះបានសរសេរលិខិតនោះសរសេរយ៉ាងដូច្នេះ "ខ្ញុំមិនអាចរស់នៅជាមួយការឈឺក្បាលទ្រាំមិនបានដូច្នេះតទៅទៀតបានទេ។ អភ័យទោសឱ្យខ្ញុំផង"។ នៅចុងបញ្ចប់នៃលិខិតនោះសរសេរថា "ម៉ាក់ស្រឡាញ់កូនខ្លាំងណាស់"។អ្នកជិតខាងនិយាយថា នាងនិងកូនស្រីជាមនុស្សល្អណាស់។ ហើយប៉ូលិសសន្និដ្ឋានថានាងសម្លាប់កូនក៏ព្រោះតែការបាក់ទឹកចិត្តមានសភាពធ្ងន់ធ្ងរពេក៕
