…ពិតជាឆោតល្ងង់ ដើរលើផ្លូវខុសបានជាប់ទោសមែន បើនាងធុញទ្រាន់លែងចង់ស៊ីឈ្នួលមើលថែកូនក្មេងម្តេចក៏មិនប្រាប់ទៅម្តាយក្មេងនោះតែម្តងទៅ មិនគួរប្រើអំពើព្រៃផ្សៃដែលជារឿងបាបកម្មគេចអត់រួចទេ! ស្ត្រីជាអ្នកបម្រើតាមផ្ទះម្នាក់ ដោយសារខឹងកូនស្រីម្ចាស់ផ្ទះដែលទើបតែមានអាយុ១៦ខែ រពឹស ម្យ៉ាងទៀតនាងចង់ទៅផ្ទះវិញផង ក៏បានចាប់ដៃក្មេងស្រីតូចនោះ ទៅជ្រលក់ក្នុងឆ្នាំងសម្ល ដែលទឹកកំពុងពុះគគ្រាក់ៗ បណ្តាលឲ្យក្មេងស្រីរងគ្រោះឈឺចាប់ស្រែកយំស្ទើរគាំង ព្រមទាំងរងរបួសដៃយ៉ាងដំណំ។ករណីព្រៃផ្សៃនេះ បានកើតឡើង នៅក្នុងប្រទេសសិង្ហបុរី។
ក្មេងរងគ្រោះ មានម្តាយឈ្មោះ Amy Low ។ ចំណែក ស្រីអ្នកបម្រើចិត្តអប្រិយ អាយុ ៣០ឆ្នាំ។
ម្ដាយក្មេងស្រីរងគ្រោះ បានរៀបរាប់ប្រាប់សមត្ថកិច្ចថា គាត់បានជួលនារីសង្ស័យមកជួយមើលថែកូន ព្រមទាំង បោកខោអាវ បោសសំអាតផ្ទះ និងដាំស្ល ធ្វើបាយម្ហូប ព្រោះគាត់និងប្តីរវល់ជាមួយការងារនៅខាងក្រៅច្រើន។ នៅថ្ងៃកើតហេតុ ពេលគាត់ត្រឡប់មកផ្ទះវិញ ឃើញដៃកូនស្រីរងគ្រោះធ្ងន់ធ្ងរដោយសាររលាកនឹងទឹកក្តៅ លុះគាត់ឆែកមើលកាមេរ៉ាសុវត្ថិភាព ស្រាប់តែឃើញសកម្មភាពស្ត្រីអ្នកបម្រើចាប់ដៃកូនស្រីគាត់យកទៅជ្រលក់ក្នុងទឹកសម្លកំពុងពុះ ធ្វើឲ្យគាត់មានចិត្តរន្ធត់អាណិតកូនស្រីជាពន់ពេក រួចក៏ធ្វើដំណើរទៅដាក់ពាក្យបណ្តឹងឲ្យសមត្ថកិច្ចធ្វើការចាប់ខ្លួនស្ត្រីអ្នកបម្រើយកទៅចាត់ការតាមផ្លូវច្បាប់តែម្តង។
នៅចំពោះសមត្ថកិច្ច ស្ត្រីសង្ស័យបាន សារភាពថា នាងពិតជាបានប្រព្រឹត្តលើក្មេងស្រីរងគ្រោះដូចការចោទប្រកាន់មែន ព្រោះតែនាងចង់ត្រឡប់ទៅផ្ទះ រួមផ្សំទាំងមានចិត្តខឹងនឹងក្មេងស្រីរងគ្រោះពូកែរពឹសពេក។ស្ត្រីសង្ស័យត្រូវសមត្ថកិច្ចធ្វើការឃុំខ្លួនបណ្តោះអាសន្ន ដើម្បីធ្វើការស៊ើបអង្កេតបន្ថែម មុនពេលចាត់ការតាមផ្លូវច្បាប់៕
