កាលពីពេលកន្លងទៅនេះ គេបានកំណាយឃើញផ្នូរបុរាណមួយ នៅជិតភូមិ Petrykiv ភាគខាងត្បូងទីក្រុង Ternopil ប្រទេសអ៊ុយក្រែន ។ នៅខាងក្នុងផ្នូរគឺជាអដ្ឋិធាតុមនុស្ស ២នាក់ នៅស្ទើរទាំងស្រុង ហើយវាជាសំណល់ចុងក្រោយ ដែលគេសន្មត់ថាជាប្តីប្រពន្ធ ២នាក់ ចំណុះវប្បធម៌ Vysotskaya (ឬ Wysocko) កាលពី ៣.០០០ឆ្នាំមុន ។
កាយវិការនៃ “អដ្ឋិធាតុ” មនុស្ស ២នាក់នេះ ធ្វើឲ្យអ្នកវិទ្យាសាស្ត្រ ងឿងឆ្ងល់ ហើយក៏សិក្សាយ៉ាងល្អិតល្អន់ ។ដោយឡែកប្តី និងប្រពន្ធមួយគូនេះដេកក្នុងកាយវិការឱបគ្នាជាប់ មុខរបស់ពួកគេងាកសំដៅទៅរកគ្នា ។ ដោយប្តីដេកផ្ងារ ក្បាលរាងងាកផ្អែកលើថ្ងាសប្រពន្ធ រីឯប្រពន្ធដេកនៅម្ខាង ដោយយកដៃលូកទ្រកងប្តី ដៃម្ខាងទៀតផ្អែកលើស្មា ជើងទាំង២របស់នាងរាងអង្កុញហើយដាក់ពីលើជើងប្តី ។
គូស្នេហ៍មួយគូនេះពិតជាមានសេចក្តីស្នេហាស្មោះស្ម័គ្រនឹងគ្នាគួរឲ្យកោតសរសើរទៅលើទឹកចិត្តរបស់ពួកគេជាពន់ពេកជាពិសេសគឺការលះបង់របស់ខាងស្រីដែលត្រូវបានគេជឿថានាងសុខចិត្តស្ម័គ្រស្លាប់តាមបុរសដែលនាងស្រឡាញ់ព្រោះមិនចង់ប្រាថ្នាគូថ្មីឡើយ៕
