…នារីម្នាក់នេះពិតជាសំណាងមែន…ខណៈកំពុងដេកស្តូកស្តឹងលើគ្រែហើយ វិះតែនឹងក្លាយជាចំណីតណ្ហារបស់ប្រុសព្រានទៅហើយ ស្រាប់តែមាននារីម្នាក់ទៀតមកគោះទ្វាបន្ទប់ដូចជួយរំដោះគ្រោះយ៉ាងអញ្ចឹង ជនសង្ស័យម្នាក់ ពេលឃើញមិត្តភក្ដិប្រពន្ធជាស្រីស្អាតម្នាក់ស្រវឹង ក៍ឆ្លៀតឱកាសលបមកចូលក្នុងបន្ទប់នាង ហើយបិទទ្វារ ចាក់សោទ្វារពីខាងក្នុងបំណងរំលោភសេពសន្ថវ: តែត្រូវប្រពន្ធមកទាន់។
ហេតុការណ៍នេះ កើតឡើងកាលពីល្ងាចថ្ងៃទី២៣ ខែមករា ឆ្នាំ២០២០ នៅផ្ទះជួល ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ។ជនសង្ស័យឈ្មោះ សួន ផាន់នី ភេទប្រុស អាយុ២១ឆ្នាំ មុខរបរកម្មកររោងចក្រ ស្នាក់នៅកន្លែងកើតហេតុ ស្រុកកំណើតនៅស្រុកបារាយណ៍ ខេត្តកំពង់ធំ។មុនពេលកើតហេតុ បុរសឈ្មោះ ផាន់ នី និង ប្រពន្ធព្រមទាំង២នាក់ទៀតជាសង្សារនឹងគ្នា ហើយនារីរងគ្រោះ បាននាំគ្នាផឹកស៊ីនៅមុខបន្ទប់ជួលដែលនៅក្បែរៗគ្នា ចាប់ពីវេលាម៉ោង១១ព្រឹក ដល់ម៉ោង៣រសៀល ។ លុះជនរងគ្រោះ ផឹកស៊ីស្រវឹងខ្លាំងពេក ក៏ត្រូវបានសង្សារមិត្តភក្ដិម្នាក់ គ្រាហ៍ចូលបន្ទប់ ហើយទាញទ្វារបិទ រួចក៏នាំគ្នាទៅបន្ទប់ជួលរៀងខ្លួនៗអស់ទៅ។លុះដល់ម៉ោង ៣ និង៣០នាទីរសៀល ស្រាប់តែជនសង្ស័យផាន់ នី មកបន្ទប់ជួលនារីរងគ្រោះម្តងទៀត គឺមកតែម្នាក់ឯងទេ ហើយបានចូលបន្ទប់នាង ចាក់សោពីខាងក្នុង បំណងរំលោភសេពសន្ថវ: តែមិនបានសម្រេចទ្បើយ ព្រោះប្រពន្ធជនសង្ស័យ មកច្រានទ្វារបន្ទប់នារីរងគ្រោះ ឃើញស្តែងនឹងភ្នែក ក៏កើតជាជម្លោះជាមួយប្ដី បន្ទាប់មកក៏ត្រលប់ទៅផ្ទះជួលវិញបាត់។
ក្រោយកើតហេតុ នារីរងគ្រោះ បានស្វាងស្រា ក៏ទៅប្តឹងសមត្ថកិច្ចប៉ុស្ដិ៍ចោមចៅទី១ ឱ្យឃាត់ជនសង្ស័យមកចាត់ការតាមច្បាប់។ តែដោយសារសមត្ថកិច្ចជាប់រវល់ ក្រោយពេលកើតហេតុរយ:ពេល៤ថ្ងៃ ទើបប៉ូលិសប៉ុស្ដិ៍ចោមចៅទី១ ធ្វើការឃាត់ខ្លួនជនសង្ស័យ យកមកសាកសួរ និងកសាងសំណុំរឿង បញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យ ដើម្បីចាត់ការតាមនីតិវិធី៕
