…មិនដែលធ្លាប់ឮទេពីមុនមក…ទើបតែបានឮនៅពេលនេះប៉ុណ្ណោះដែលសត្វធ្វើខុស ត្រូវបានលោកចៅក្រមកាត់ទោសឲ្យជាប់គុកដូចមនុស្សដែរ។ខ្លាឃ្មុំញីមួយក្បាល ត្រូវបានលោកចៅក្រមកាត់ទោសដាក់ពន្ធនាគារអស់មួយជីវិត បន្ទាប់ពីប្រព្រឹត្តកំហុសធ្ងន់ធ្ងរ២ដង ដោយវាយប្រហារមនុស្ស ២នាក់ឱ្យរងរបួស។ រហូតមកដល់ពេលនេះ វាបានចំណាយពេល ១៥ឆ្នាំហើយ នៅក្នុងពន្ធនាគារនៃប្រទេសកាហ្សាក់ស្ថាន ហើយមិនអាចលែងចេញមកវិញបាន ព្រោះខ្លាចបង្កគ្រោះថ្នាក់ដល់អ្នកផ្សេង។
ខ្លាឃ្មុំនេះ មានឈ្មោះ Katya ត្រូវបានកាត់ទោសដាក់ពន្ធនាគារកាលពី ១៥ឆ្នាំមុន។ ក្រោយពីវាបានវាយប្រហារមនុស្ស ២នាក់ឱ្យរងរបួសនៅជំរំដែលធ្លាប់ដាក់ឱ្យរស់នៅពីមុន។ បើតាមប្រភពព័ត៌មានបានបញ្ជាក់ថា Katya ជាគឺសត្វញីតែមួយគត់ ក្នុងចំណោមសត្វ ៧៣០ក្បាល ដែលប្រព្រឹត្តកំហុស ហើយត្រូវចាប់ដាក់ពន្ធនាគារជាមួយគ្នានេះ ហើយក៏ជាសត្វជាប់ទោសអស់មួយជីវិតម្នាក់ឯងគត់។បើតាមរូបថតប៉ុន្មានសន្លឹក ដែលគេថតបាន បង្ហាញថាខ្លាឃ្មុំនៅជាប់ក្នុងគុកយ៉ាងកម្សត់។ ជាមួយគ្នានេះដែរ ខាងឆ្មាំយាមកាមនៅទីនោះ បានឱ្យដឹងថា ខ្លាឃ្មុំញីនេះ លែងមានសភាពកាចសាហាវដូចមុនហើយ ប្រហែលអាចមកពីលទ្ធផលនៃការជាប់ពន្ធនាគារ ១៥ឆ្នាំ។ ទោះបែបនេះក្ដី ដោយសារទោសធ្ងន់ធ្ងរពេក ខ្លាឃ្មុំនេះត្រូវទទួលពិន័យលើសសត្វដទៃ ហើយសូម្បីយកខ្លាឃ្មុំឈ្មោលមកបង្កាត់ពូជជាមួយក៏មិនបានដែរ។លោក zamat Gapbasov ដែលជាអ្នកបំពេញការងារនៅពន្ធនាគារសម្រាប់សត្វនោះ បានបញ្ជាក់ថា បើចង់បង្កាត់ពូជ មានវិធីតែមួយគត់ គឺបង្កាត់នៅក្រៅខ្លួន តែមិនអាចឱ្យខ្លាឃ្មុំនេះជួបខ្លាឃ្មុំឈ្មោលឡើយ។ កំហុសដែលខ្លាឃ្មុំនេះប្រព្រឹត្ត គឺកើតឡើងតាំងពីឆ្នាំ២០០៤ ហើយក៏ត្រូវគេចាប់មកដាក់គុករហូត និងបន្តអស់មួយជីវិត ក្រោមការការពាររបស់ឆ្មាំជាច្រើនរូប។
ទោះបែបនេះក្ដី មនុស្សជាច្រើន បានបង្ហាញការអាណិតចំពោះខ្លាឃ្មុំមួយក្បាលនេះ ដែលមិនអាចរស់នៅជាមួយធម្មជាតិ បែរជាត្រូវរស់នៅមួយកន្លែង។ អ្នកខ្លះ បានស្នើឱ្យលែងខ្លាឃ្មុំនេះ ចូលទៅក្នុងព្រៃ រស់តាមបែបធម្មជាតិរបស់វា។ ប៉ុន្តែមិនដឹងមូលហេតុអ្វី បានជាការសម្រេចចិត្តទុកវានៅក្នុងពន្ធនាគារ ចំណាយពេលមើលថែ ហើយទីនេះមិនមែនជាសួនសត្វឡើយ៕
