…នៅក្នុងខ្សែភាពយន្ត បិសាចជញ្ជក់ឈាម…ធ្វើអ្វីមនុស្សមិនកើតទេនៅពេលដែលមានពន្លឺព្រះអាទិត្យគឺរូបកាយរបស់វារលាយភ្លាម…។យ៉ាងណាក្មេងប្រុសម្នាក់កំពុងតែកើតមាននូវជម្ងឺអ្វីម្យ៉ាងមានសភាវៈប្រៀបបានជាបិសាចជញ្ជក់ឈាមយ៉ាងអញ្ចឹងដែរ។ ក្មេងប្រុស Xiao Luo អាយុ១២ឆ្នាំ រស់នៅក្នុងទីក្រុង Panzhihua មានជំងឺចម្លែកខ្លាចពន្លឺព្រះអាទិត្យពីតូចមកម្ល៉េះ។ រូបគេតែងតែមានអារម្មណ៍ឈឺចាប់ ហើមនិងរលាកស្បែក ពេលដែលគេស្ថិតនៅក្រោមពន្លឺព្រះអាទិត្យម្ដងៗ ហើយអាការបែបនេះកាន់តែយ៉ាប់យ៉ឺន ដោយមានឈាមហូរចេញតាមមាត់ ភ្នែកនិងច្រមុះទៀតផង។
គ្រូពេទ្យក្រោយពីធ្វើតេស្ដរួច បានឲ្យដឹងថា ក្មេងប្រុស Xiao Luo មានផ្ទុកជំងឺកម្រមួយឈ្មោះ Porphyria ដែលគេជឿថាជាជំងឺដូចនឹងបិសាចជញ្ជក់ឈាមក្នុងរឿងព្រេង។ យ៉ាងណាក្ដី គេមិនដឹងច្បាស់ពីមូលហេតុដែលបង្កឲ្យមានជំងឺនេះឡើយ តែតួលេខបង្ហាញថា មនុស្សម្នាក់ក្នុងចំណោយមនុស្ស៥០,០០០នាក់បានរងគ្រោះដោយសារជំងឺនេះ។ លោក Tang ដែលជាឪពុកបាននិយាយទាំងទឹកភ្នែកថា៖ «ខ្ញុំធ្លាប់ឃើញបិសាចជញ្ជក់ឈាមនៅក្នុងខ្សែភាពយន្តពីមុនដែរ ហើយនៅពេលដែលខ្ញុំឮគ្រូពេទ្យប្រាប់ពីអាការកូនប្រុស ខ្ញុំមិនអាចទទួលយកបានទេ។ ម្យ៉ាងវិញទៀត កូនប្រុសខ្ញុំមិនដែលជញ្ជក់ឈាមមនុស្សឡើយ។» ស្ថានភាពជំងឺរបស់ក្មេងប្រុស Xiao Luo បណ្ដាលឲ្យប៉ះពាល់ដល់សុខភាពថ្លើម និងឆ្លងមេរោគសួត ហើយចំនួនផ្លាកែត កោសិកាឈាមស និងកោសិកាឈាមក្រហមគឺចុះទាបខ្លាំងផងដែរ។
យ៉ាងណាមិញ ដោយសារជីវភាពខ្វះខាតខ្លាំង ឪពុកម្ដាយរបស់ក្មេងប្រុស Xio Luo ក៏បានស្នើសុំជំនួយពីសប្បុរសជនឲ្យជួយ ព្រោះកំឡុងពេលព្យាបាលក្នុងមន្ទីរពេទ្យ ពួកគេត្រូវចំណាយប្រាក់អស់ចំនួន១,៥០០យ័ន គឺប្រមាណ២១៣ដុល្លារ ទៅលើថ្នាំនិងការថែទាំក្នុងមួយថ្ងៃ៕
