…គ្រាន់តែទាស់ពាក្យសម្តីកើតទៅជាភ្លើងកំហឹង…ភ្នំមួយពុំអាចមានខ្លាពីរដេញកាប់គ្នាវក់វីមានអ្នកស្លាប់និងអ្នករបួសនោះជនដៃដល់ដែលទទួលបានជោគជ័យលើគូទំនាស់ក៏ច្រើនតែមិនបានសុខដែរ…ដូចកុកភ្លេចជង់…ឯជង់អត់ដែលភ្លេចកុកទេ…ទោះជាយូរប៉ុណ្ណាក៏គង់តែប៉ូលិសវែកមុខចាប់ខ្លួនបាន។កម្លាំងសមត្ថកិច្ចបាននិងកំពុងតាមចាប់ខ្លួនជនសង្ស័យចំនួន២នាក់ ដែលជិះម៉ូតូតាមកាប់យ៉ាងសាហាវ បណ្ដាលឱ្យយុវជនម្នាក់បាត់បង់ជីវិត និងម្នាក់ទៀតរងរបួស កាលពីយប់ថ្ងៃទី២៩ មករា នៅលើដងផ្លូវមួយកន្លែងនៅក្នុងភូមិបោះពោធិ៍ ឃុំអូរដំបង១ ស្រុកសង្កែខេត្តបាត់ដំបង ។
មន្ត្រីនគរបាលការិយាល័យព្រហ្មទណ្ឌកំរិតធ្ងន់ ខេត្តបាត់ដំបងបាននិយាយថា អំពើនេះ បង្កឡើងដោយពួកក្មេងទំនើង២នាក់ដែលគេមិនទាន់ស្គាល់អត្តសញ្ញាណនៅឡើយ ។ ពួកគេបានជិះម៉ូតូដេញតាមកាប់ទៅលើយុវជន២នាក់ទៀត ដែលកំពុងជិះម៉ូតូដែរបណ្ដាលឲ្យម្នាក់បាត់បង់ជីវិត និងម្នាក់ទៀតរងរបួស ហើយជនដៃដល់បានជិះម៉ូតូគេចខ្លួនបាត់ទាំងយប់ ។ មន្ត្រីដដែលបានបញ្ជាក់ថា បើតាមការស្រាវជ្រាវបឋមជនសង្ស័យជិះម៉ូតូម៉ាកអ៊ីសិចទ័រ ពណ៌ខៀវ គ្មានស្លាកលេខ តែអ្នកជិះក្រោយមានកាន់កាំបិតវែង ។ យោងតាមរបាយការណ៍សមត្ថកិច្ច ជនរងគ្រោះទាំង២នាក់ ម្នាក់ឈ្មោះ លន់ កែវ ភេទប្រុស អាយុ១៧ឆ្នាំ នៅភូមិអូរដំបង ឃុំអូរដំបង២ ស្រុកសង្កែ រងរបួសក្បាលខាងឆ្វេងយ៉ាងធ្ងន់ធ្ងរ តែបានបាត់បង់ជីវិតពេលបញ្ជូនដល់មន្ទីរពេទ្យខេត្ត និងម្នាក់ទៀតឈ្មោះ ផាន ភក្តី ភេទប្រុស អាយុ១៦ឆ្នាំ នៅភូមិអូរដំបង ឃុំអូរដំបង២ ស្រុកសង្កែជាអ្នកបើកបាន រងរបួសក្បាលខាងឆ្វេងមួយកន្លែង៥ថ្នេរ ។ ជនរងគ្រោះបានឱ្យដឹងថា មុនពេលកើតហេតុជនរងគ្រោះបានជិះម៉ូតូជាក្រុមចំនួន៤គ្រឿង ហើយរូបគេបានជិះនៅកណ្ដាល ក្នុងចំណោមទាំង៤គ្រឿងនោះ។ ប៉ុន្តែជិះដល់ចំណុចកើតហេតុ ស្រាប់តែមានជន២នាក់ជិះម៉ូតូតាមមកក្រោយ ហើយដកកាំបិតកាប់ទៅលើពួកគេតែម្ដង ។
មន្ត្រីជំនាញបានបញ្ជាក់ថា បើតាមការសាកសួរ និងការស្រាវជ្រាវ ជនដៃដល់អាចមានគំនុំជាមួយជនរងគ្រោះ ទើបពួកគេជិះម៉ូតូតាមកាប់យ៉ាងសាហាវបែបនេះ។ ទោះយ៉ាងណា ពេលនេះ កម្លាំងការិយាល័យជំនាញកំពុងតាមស្រាវជ្រាវ ដើម្បីកំណត់មុខសញ្ញាជនសង្ស័យទាំង២នាក់នោះហើយ ៕
