…សកម្មភាពស្រីដណ្តឹងប្រុសនៅតាមស្រុកគេពុំមែនជារឿងត្រូវសើចចំអកអីនោះទេ មានការគាំទ្រលើកទឹកចិត្តបន្ថែមប៉ុណ្ណោះ។ គ្រាន់តែស្រីដណ្តឹងប្រុសយូរៗឃើញលេចចេញនូវព័ត៌មានមួយៗទេ…មិនដូចជាប្រុសដណ្តឹងស្រី កើតឡើងសឹងរាល់ថ្ងៃ។កាលពីពេលថ្មីៗនេះ នារីម្នាក់នៅក្នុងប្រទេសហ្វីលីពីន បានលុតជង្គង់សុំមិត្តប្រុសរៀបការ នៅក្នុងភោជនីយដ្ឋានមួយកន្លែង ដែលមានមនុស្សជាច្រើន។
នារីរូបនេះមានឈ្មោះ Ulvic Berdecen ហើយមិត្តប្រុសរបស់នាងមានឈ្មោះថា Cheska Galves។ ពួកគេទាំងពីរមានទំនាក់ទំនងស្នេហាជាមួយនឹងគ្នាអស់រយៈពេល១ឆ្នាំមកហើយ។ នៅក្នុងថ្ងៃដ៏ពិសេសនោះដែរ លោក Cheska បានអញ្ជើញក្រុមគ្រួសារទាំងសងខាងមកជួបជុំ ដើម្បីទទួលទានអាហារពេលល្ងាចជាមួយគ្នាធម្មតាប៉ុណ្ណោះ។ យោងតាមវីដេអូបានបង្ហាញឲ្យឃើញថា ខណៈពេលកំពុងទទួលអាហារ ស្រាប់តែបទចម្រៀងដ៏លន្លង់លន្លោចបានរំពងឡើង ហើយក៏មានបុគ្គលិក៣នាក់បានហុចផ្កាកូឡាបទៅកាន់លោក Cheska។ រំពេចនោះ នាង Ulvic បានដើរចេញមក ហុចផ្កាកូឡាបមួយទងទៀតទៅកាន់លោក Cheska ហើយយកប្រអប់ចិញ្ចៀនចេញ និងលុតជង្គង់សុំរៀបការ។ លោក Cheska បាននិយាយថាយល់ព្រម ទាំងដែលរូបគាត់កំពុងស្រឡាំកាំង។ ទិដ្ឋភាពដ៏កម្របានឃើញមួយនេះ បានធ្វើឲ្យ លោក Cheska និងក្រុមគ្រួសារទាំងសងខាង ព្រមទាំងភ្ញៀវនៅក្នុងភោជនីយដ្ឋានរំភើបស្ទើរតែទប់ទឹកភ្នែកមិនជាប់រៀងៗខ្លួន។
ជុំវិញវីដេអូខាងលើនេះ ទទួលបានការចាប់អារម្មណ៍យ៉ាងខ្លាំងនៅលើបណ្ដាញសង្គមហ្វេសប៊ុក និងមានអ្នកចូលទស្សនារហូតដល់ទៅ១.៨លានដងឯណោះ៕
