…មនុស្សយើងមានចិត្តមិនដូចគ្នានោះទេ អ្នកខ្លះគ្រាន់តែដីបានថ្លៃលក់ភ្នែកទៅវិញកន្លែងផ្សេងសល់លុយសង់ផ្ទះថ្មីច្រឺង…ទិញឡានជិះយ៉ាងសង្ហា ដើរចូលហាងផឹកស៊ី ធ្វើខ្លួនតាមបែបមនុស្សសម័យអ៊ិន ធឺណែត។ អ្នកខ្លះលក់ដី យកប្រាក់មករកស៊ីបង្កើនទ្រព្យដូចដាក់ចុះ ដុះឡើងក្លាយជាសេដ្ឋី។ ចំណែកអ្នកខ្លះទៀតទោះបីជាដីគេឲ្យថ្លៃកប់ពពក អត់លក់យកប្រាក់ទៅអភិវឌ្ឍន៍ជីវិតរស់នៅ នៅកន្លែងផ្សេងឲ្យខ្ពស់មុខខ្ពស់មាត់នោះទេ សុខចិត្តរស់នៅក្នុងជីវភាពសាមញ្ញធម្មតា ដែលគេហៅអត់ដើរទាន់សម័យរុងរឿង។ដូចជាបុរសម្នាក់នៅប្រទេសថៃ មានដីកេរ ៥០រៃនៅក្រុងបាងកក ដែលអ្នកវិនិយោគតាមទិញឱ្យថ្លៃសរុបដល់ទៅ ៤៧លានដុល្លារ តែមិនព្រមលក់ទេ សុខចិត្តបន្តធ្វើស្រែចម្ការដូចពីមុន។
បើតាមប្រភពព័ត៌មានរបស់ប្រទេសថៃ បានឱ្យដឹងថា ដីដែលគេតាមទិញនោះ មានទំហំសរុប ៥០រៃ ស្មើនឹង ៨ហិកតា។ អ្នកវិនិយោគបាននាំគ្នាឱ្យថ្លៃដីនោះ រហូតដល់ ៣០លានបាតគឺប្រមាណ ៩៤ម៉ឺនដុល្លារ ក្នុងមួយរៃ ដោយសារពួកគេមើលឃើញតំបន់នោះ ព័ទ្ធជុំវិញដោយទីប្រជុំជន មានផ្លូវខ្វាត់ខ្វែង ហើយមានបំណងទិញដីនោះមកសង់ជាអគារ និងវិឡាផ្សេងៗ។ម្ចាស់ចម្ការ និងដីស្រែនៅក្រុងបាងកកម្នាក់នេះ ឈ្មោះ Somphote Thapcharoen អាយុ ៦០ឆ្នាំ។ បុរសចំណាស់រូបនេះ ជាអតីតអ្នកស្រាវជ្រាវផ្នែកកសិកម្ម។ ប៉ុន្តែ ឆ្នាំ២០១៤ លោកនិងប្រពន្ធ បានសម្រេចចិត្តលាឈប់ពីការងារ បោះបង់ប្រាក់កម្រៃប្រមាណរួមគ្នាសរុប ៣ម៉ឺនដុល្លារក្នុងមួយឆ្នាំ រួចក៏បើកសិដ្ឋានចម្រុះមួយនៅកណ្ដាលក្រុងបាងកកតែម្ដង។ដីដ៏ធំនោះ គឺជាកេរបន្សល់ទុកពីឪពុករបស់លោក ហើយលោកបានស្រលាញ់កសិកម្មដូចឪពុក និងធំធាត់បើកភ្នែកមកជាមួយធម្មជាតិបែបនេះ។ លោកបានចាប់ផ្ដើមដាំដំណាំជាច្រើនប្រភេទ មានទាំងស្រូវ ស្វាយ ជីកស្រះចិញ្ចឹមត្រី ដាំបន្លែច្រើនមុខ។ ក្រោយមក លោកក៏បានបើកភោជនីយដ្ឋានមួយនៅកសិដ្ឋានផ្ទាល់ ដោយប្រើប្រាស់បន្លែធម្មជាតិ ដែលលោកដាំដោយផ្ទាល់ដៃតែម្ដង។នៅពេលសួរថា ហេតុអ្វីគេឱ្យថ្លៃប៉ុណ្ណឹង លោកមិនព្រមលក់ធ្វើអ្នកមាន? លោក Sompoch បាននិយាយថា ឱ្យលោកសប្បាយជាមួយលុយដូចម្ដេច បើចិត្តលោកមានក្ដីសុខជាមួយការធ្វើស្រែចម្ការ ស្ទូចត្រី ដាំផ្កាទៅហើយ។ បើគ្មានបរិយាកាសបែបនេះ ទោះគំនរមាសប្រាក់ ក៏មិនអាចធ្វើឱ្យលោកសប្បាយដែរ។ ដូចនេះហើយ ទើបលោកចង់ប្រើដីនេះ ដើម្បីកម្សាន្តក្នុងជីវិតសាមញ្ញរបស់លោក។ អ្នកចម្ការរូបនេះថែមទាំងនិយាយទៀតថា សម្រាប់គេបើគិតថាសប្បាយព្រោះលុយ ជារឿងរបស់គេ ព្រោះក្ដីសុខរបស់មនុស្សមិនដូចគ្នាទេ។
លោក Somphote Thapcharoen ប្រាប់ថា នៅថ្ងៃអនាគត លោកមានបំណងប្រាថ្នាបើកជាបន្ទប់សម្រាប់ស្នាក់នៅតាមបែបស្រុកស្រែ ទទួលយកបទពិសោធន៍ធម្មជាតិពិតៗនៅលើកសិដ្ឋាន ៥០រៃរបស់លោក ដែលនៅកណ្ដាលក្រុងបាងកក មិនចាំបាច់ធ្វើដំណើរទៅណាឆ្ងាយ៕
Home សង្គមប្លែកៗ ប្រាកដជាមានអ្នកស្តាយ…អាយុច្រើនបន្តិចហើយម៉េចមិនស្រវារប្រាក់ខ្ទង់លានដុល្លារ រស់ជាសេដ្ឋីបន្តរស់នៅជាកសិករកណ្តាលក្រុងបាងកកទៅវិញ!